Icelandairip aningaasaqarnerliortup unammillertini peqatigilerpaa
Icelandair aamm Wow Air, tamarmik Islandimiittut kattupput. Ingerlatseqatigiiffiit aningaasaqarnikkut ilungersunartorsiornikuupput.
Timmisartortitseqatigiiffik Icelandair aningaasaqarnerliortoq aamma Wow Air kattupput, taanna aamma Islandimi suliffeqarfiuvoq.
Icelandair nalunaarummi taama ilisimatitsivoq.
Atlantiku qulaallugu angalasut timmisartortitseqatigiippassuit unammissutigisaanni, ingerlatseqatigiiffiit taakku marluk kattunnermikkut unammilleqatigiinnermi pitsaanerusumik inissisimalerniarput.
- Ingerlatseqatigiiffinnut taakkununnga sunneeqatigiinnissamut periarfissat amerlapput, kisianni taakku nammineq atitik atuinnarlugit ingerlassapput, Bogi Nils Bogasen, Icelandairimi pisortaq nalunaarummi taama oqarpoq.
Ingerlatseqatigiiffiit kattutereernermini Europap aamma Amerikap Avannarliup akornanni timmisartuussinerit 4 procentii ingerlatarissavaat.
Icelandair qaammatini kingullerni aningaasaqarnikku ingerlanerliorpoq. Taamaattumillu akiitsuminik akilersuisinnaasimanngilaq.
Timmisartortitseqatigiiffik taamaattumik taarsigassaqarfimminut aaqqiissutissamik nassaarniarluni qanittukkut oqaloqateqartariaqarsimavoq.
Wow Air aamma aningaasaqarnikkut ilungersunartorsiorsimavoq. Islandimi timmisartortitseqatigiiffiit ataatsimut isigalugit tatisimaneqarput.
Angalasut unammilleqatigiissutigineqarnerat aamma ikummatissap akiata qaffakkiartornera aningaasanik iluanaaruteqarnissaq ajornakusoortilersimavaa.
Icelandairip aanna Wow Airip akornanni niueqatigiinneq Wow Airimi piginneqataassuteqartut Icelandairimi piginneqataassutsinik pinerisigut pissaaq.
Niueqatigiinnerup inissinneqannginnerani Icelandairimi piginneqataasut akuerseqqaassapput.
Tamatuma saniatigut aamma Islandimi unammilleqatigiinnermi oqartussat akuerseqqaassaallutik.
/ritzau/