reality-TV
´Ice Cold Gold´-imik immiussisut takunneqqinnertik nuannaarutigaat
Amerikarmiut aallakaatitassiortut septembarip qiteqqunerata tungaanut Nunatsinniissapput tv-kut reality-mik aallakaatitassiaq nuannarineqartoq sæsoni nutaaq immiutissallugu
Aliikkutassiaq anginerusoq pisoqarfiunerusorlu!
Tassa TV-kut isiginnaartartut qilanaarisinnaasaat, amerikarmiut reality-mik aallakaatitassiaat ´Ice Cold Gold´ sæsoni nutaaq piffissap ilaani aallakaatinneqalerpat.
Maannakkorpiaq aallakaatitassiortut Nunatsinnillu peqataasut pinngortitami immiussanik nalissaqanngitsunik filmiliuleruttorput.
– Sæsonip siulliup aappaatalu assigiinngissutigaat aliikkutassiaq anginerulersissagatsigu. Ungasinnerusumukassaagut sumiiffinnullu tikeraarluta, filmiliornermi qiortaasartoq David Casey Radioaviisimut oqarpoq, oqaluttuarlunilu aallakaatitassiortut septembarip qiteqqunnerata tungaanut Nunatsinniissasut.
Tamatuma kingorna siullermik kujataani aatsitassanik ujarlertoqassaaq, immiussinerillu naaneqassapput Qeqertarsuup Tunuani.
Atuaruk "Kalaallit Nunaat kuultisiortunut neriunartulik"
Sæsonimit siullermit Katuami takutitseqqaarnermit assit takukkit
Ice Cold Gold USA-mi TV-kut isiginnaartartunit nuannarineqarluarpoq katillugit isiginnaartunit 15 millioninit takuneqarsimalluni.
– Sæsoni siulleq USA-mi aallakaatitsinitsinnit ilikkarsimavarput kalaallinik innuttaasunik kalaallillu kulturiannik annertunerusumik paasisaqarnissaq soqutigineqartorujussuusoq, David Casey Radioaviisimut oqarpoq.
Reality-mik aallakaatitassiami sæsoni siulleq USA-mi naareersimasoq unnulu marlunngornermi nalunaaqutaq 20.00 Nunatsinni Danmarkimilu Discovery Channel-ikkut Inuit Nunaannit immikkoortut pingajuat takutinneqassaaq.