Alaskamut tikeraarneq
ICC-p præsidentia: Obamap tikeraarnera isumalluartitsilerpoq
ICC Grønlndsip præsidentia Hjalmar Dahl isumaqarpoq Obamap Alaskamut angalaneratigut ICC-p Issittumi Siunnersuisoqatigiinni peqataalernissaanut isumalluartitsilersoq
ICC Grønlandip nuannaarutigaa USA-p præsidentiata ulluni pingasuni Alaskamut tikeraarsimanera, tassani ilaatigut nunap inuvii naapillugut, ilaatigut Kotzebue-mi Inuppiaat.
– USA ukiuni tulliuttuni marlunni Issittumi Siunnersuisoqatigiinni siulittaasuuvoq, taamaattumik nunap siuttuata innuttaasut ernumanartitaat tusarniarlugit Issittumut angalanera pingaarutilimmik takussutissartaqarpoq, ICC Grønlandip præsidentia Hjalmar Dahl allappoq.
Nunat inuiisa pisinnaatitaaffii pimoorullugit
ICC-p præsidentia isumaqarpoq Obamap nunap inuiisa siuttuinik naapitsinera annertuumik takussutissatut naleqartoq.
– Præsidentip arlaleriarluni USA-mi nunap inuiisa siuttui ataatsimeeqatigisimavai. Tamanna aamma takussutissatut naleqarluarpoq, tassa nunani tamalaani inuiaqatigiinnut takutinneqarmat nunap inuiisa pisinnaatitaaffii pimoorunneqartariaqartut, Hjalmar Dahl allappoq.
Taassuma Obamap angalanera Issittumi Siunnersuisoqatigiinni peqataalernissamut isumalluartitsilersoq.
– Ilumoorlunga isumaqarpunga Barack Obama nunami naalagaaffiit nunallu inuiisa akornanni pissutsinut kingunissalimik iliuuseqarsimasoq, ICC Grønlandip præsidentia naggasiivoq.