ICC-p inuit akornanni niueqatigiinneq nukittorsarniarpaa

Annerusumik nammineersinnaassuseqalerneq anguniarlugu imminut pilersorneq nukittorsarneqassaaq, Utqiagvimmit nalunaarummi tamanna atuarneqarsinnaavoq.

ICC-mi siulersuisuunerit (saamimmit): ICC Canada Præsident Monica Ell-Kanayuk, ICC Tjukotka Præsident Lobov Talian, ICC Kalaallit Nunaanni Præsident Hjalmar Dahl, Elena Kaminskaya, Siulersuisuni ilaasortaq Tjukotka, ICC tamakkiisumi siulittaasoq Dalee Sambo Dorough, Alaska, Nuka Kleemann, Siulersuisuni ilaasortaq Kalaallit Nunaat, Lisa Koperqualuk, Canada siulersuisuni ilaasortaq, Vera Metcalf, siulersuisuni ilaasortaq Alaska aamma ICC Alaska Præsident Jimmy Stotts.

Niueqatigiinneq nukittorlugu aamma annerusumik imminut pilersorneq inuit aqqutissaraat. Utqiagvimmit nalunaarummi immikkoortut ilaat tamakkununnga tunngassuteqarput, taanna ICC-p ataatsimeersuarneranit naggasiutitut allagartaavoq.

ICC-mi ataatsimeersuarnerup aamma ‘politikkit inuit killeqarfiisigut niueqatigiinnermik siuarsaasut tapersersornissaannut, suliffeqartitsineq aamma najukkatsinni angalanerit’ kajumissaarutigai.

ICC-p aamma Pikialasorsuup ingerlanneqarnera Kalaallit Nunaata aamma Canadap akornanni inuit ataatsimut ingerlatsisutut oqartussaaqatigiinnerannut nuunneqarnissaa kissaatigaa. Tassanilu aamma niueqatigiinneq angalanerillu pilerseqqinneqassapput.

Utqiagvimmit nalunaarut ataatsimut qulequttat qulit iluanni 58-nik immikkoortortaqarput. Ima qulequtaqarput:

  • Pisinnaatitaaffiit nunallu tamalaat akornanni peqatigiinnerit
  • Inuussutissanik isumannaarinissat namminerlu pilersornerup annertusarnissaa
  • Ilaqutariit, meeqqat inuusuttullu
  • Peqqinneq aamma inuummarinneq
  • Ilinniartitaaneq oqaatsillu
  • Nunat inoqqaavisa ilisimasaasa tamatigut salliutillugit atornissaat
  • Piujuartitsineq tunngavigalugu uumasunik nujuartanik aqutsineq ineriartornerlu
  • Avatangiisit illersornissaat
  • Piujuartitsinermik tunngaveqarluni ineriartortitsineq
  • Attaveqatigiinnerup siuarsarnissaa piginnaanngorsaanerlu

ICC tamakkiisumi siulittaasunngortoq tassaavoq Dr. Dalee Sambo Dorough, Alaskami Inuppiaq.

Hjalmar Dahl ICC Kalaallit Nunaanni siulittaasutut ingerlaqqippoq siulittaasup tualliatut Nuka Kleemann.

Powered by Labrador CMS