ICC-p innuttaasut peqataatinnissaat sorsuutigissavaa

Inuit peqataatinneqarnerat pitsaanerusoq.

ICC-p ataatsimeersuarnerani aallartitat – Nunatsinniit Siumumeersut IA-meersullu saniatigut kattuffinnit assigiinngitsuneersut inuiaqatigiillu kalaallit amerlasuut sinniisigisaasa, tassalu inuusuttut, aalisartut, piniartut, sulisartut, eqqumiitsuliortut allarpassuillu aallartitaasa, aalajangiuteqqammerpaat, ICC-p ukiuni tulliuttuni sisamani sulinermini suut qitiutissanerai.

Tamanna Kitigaaryunnit (Kitigaarjunnit) Nalunaarummik taaneqartumi ataatsimeersuarnermilu ullumi naammassisumi tamanit akuerineqartumi ersippoq.

Pingaarutilik
- ICC-p pisinnaatinneqarnera uagutsinnut Kalaallit Nunaanniittunut pingaartuuvoq. Kalaallit aallartitaasa oqaatigineqartutut amerlasuunik tunuliaqutaqartuusut, Inatsisartunilu amerlanerussuteqarluartunik tunuliaqutaqartut taamaalillutik kissaatigaat ICC-p innuttaasut peqataatinneqarnerunissaat ICC-p sulissutigissagaa, innuttaasut politikerinit qarsupiinnarneqaqqunagit. Qularinngilara tamatuma isumannaarnissaanut ICC piareersimasoq, ICC-mut siulittaasutut tunuartoq Aqqaluk Lynge oqarpoq.

Suliassat assigiinngitsut
Nalunaarutip aammattaaq ICC-p ukiuni tulliuttuni sisamani tullianillu ataatsimeersuarnissap tungaanut assigiinngitsutigut suliniuteqarfissai saqqummiuppai.

Suliassanut qulequtaasut ilaatigut tassaapput oqaatsitigut politikki, aatsitassarsiorneq, qangaaniilli ilisimasat nunallu killiit ilisimatusarnerisa ataqatigiinnerat, tarnikkut timikkullu peqqissuseq, kulturi ilinniartitaanerlu aamma pinngortitamik illersuineq, tamannami ukiuni kingullerni silaannaap allanngoriartorneranik sunnerneqarpoq. Kiisalu ICC-p nangilluni Inuit nunarsuaq tamakkerlugu soqutigisaat sulissutigiuassagai, ilaatigut Naalagaaffinni Peqatigiinni Issittumilu Siunnersuisoqatigiinni.

Isumaliutersuut Kitigaaryuit tuluttuinnaq allassimasoq atuarneqarsinnaavoq