New York
ICC nuannaarpoq: Utoqqatsissuteqartarneq massakkut qaangiuttutut oqaatigisariaqarpoq
Kalaallit Nunaanni ICC-p siulittaasuata Hjalmar Dahlip nunarsuarmioqatigiit ataatsimeersuarneranni ataatsimeersuarnerup inaarutaa nuannaarutigaa
- Inaarutaasumik oqaaseqaat ICC-p tungaanit iluarisimaarparput, kiisami nunat inoqqaavisa pisinnaatitaaffii pillugit atuutsitsilersitsinissamut alloriaatissanik Naalagaaffiit FN-imut ilaasortaasut ilaatigut imminnut pisussaaffilermata, tamannalu siunissamut tamatsinnut neriulersitsivoq.
ICC-p Kalaallit Nunaanni siulittaasua Hjalmar Dahl naliliivoq.
Nunarsuarmioqatigiit ataatsimeersuarneranni nunap inoqqaavi ataatsimeersuartinneqarnerat marlunngornermi naammassineqassaaq.
Ataatsimeersuarnerup ammarnersiorneqarneranut atatillugu oqalugiartut pingaarnerit ilagaat Naalagaaffiit Peqatigiit Allattaanerat Ban Ki-moon aamma Norgemi Saamit inatsisartuisa præsidentiat Aili Kestitalo. Ataatsimeersuarnerup inaarutissatut suliaa taasinertaqanngitsumik ingerlanneqarpoq.
- Inaarutaasumik oqaaseqaat Naalagaaffinnut arlalissuarnik pisussaaffiliivoq. Nunat inoqqaavisa pisinnaatitaaffii eqqartorneqartillugit nunani namminermi iliuusissat pillugit nunat inoqqaavisa qanimut suleqatigisarnissaanik ilaatigut aamma pisusaaffiliigami. Pisussaaffiliineq tamanna nutaajuvoq, nunammi inoqqaavisa pisinnaatitaaffii nalinginnaasumik oqaluuserineqartillugit Naalagaaffinnut pituttuisuunngitsutut inissisimaneri utoqqatsissutaalluni atuutilersinneqarnissaanik pisussaaffeqarnermik maannamut inissittoqarneq ajorpoq, Hjalmar Dahl nassuiaavoq, tusagassiutinut nalunaarummi Hjalmar Dahl nassuiaavoq.
Alloriarfissap tullia
- Utoqqatsissuteqartarneq massakkut qaangiuttutut oqaatigisariaqarpoq, Naalagaaffiimmi Inaarutaasumik Nalunaarutip atuutilersinneqarnissaa siunertaralugu imminnut qaangiinnarsinnaanngisaminnik pisussaaffilerput. Massakkut Naalagaaffiit nunatsinnilu Namminersorlutik Oqartussat peqatigalugit siumut isigaluta sulisinnaanngorpugut, tamannalu ICC-p tungaanit qilanaaraarput, Hjalmar Dahl naggasiivoq.
ICC-p siulittaasortaava Okalik Eegeesiak ataatsimeersuarnermi peqataavoq Nunatsinnilu ICC-p siulittaasua Hjalmar Dahl, ICC Kalaallit Nunaanni Siulersuisuini ilaasortat Aqqaluk Lynge aamma Aili Liimakka Laue, siulersuisuni ilaasortaasimasoq Carl Chr. Olsen kiisalu Aviaaja Egede Lynge ICC sinnerlugu ataatsimeersuarnermi peqataapput.
ICC-p Kalaallit Nunaata aaqqissugaanik Alaskamiit, Canadamiit Nunatsinniillu peqataasut katillugit 14-iupput. Naggueqatigiit Inuit inuusuttaat namminneq aaqqissukkaminnik aamma peqataatitaqarput.
Ammaanersiorneq sioqqutitsiarlugu ataatsimeersuarnerup inaarutissatut oqaaseqaatisaa Naalagaaffiit FN-imut ilaasortaasut ICC-llu peqataaffigisaanik nunat inoqqaavi sinnerlugit isumaqatigiinniartut akornanni isumaqatigiissutigineqareersimavoq.