ICC nersualaarisoq: HFO-p inerteqqutaalernissaa pingaaruteqartoq
Umiarsuit Issittumi angalatillutik uuliamik oqimaattsumik/kinertumik atueqqusaajunnaarnissaannik Naalagaaffiit Peqatigiit Imaani Angallannermut Kattuffissuata IMO-p maleruaqqusissutissatut siunertaa Naalakkersuisut tapersersorniarlugu nalunaarutaat ICC-mit nuannaarutigineqarpoq.
- Isumaqarpunga Naalakkersuisut aalajangiinerat, Issittup imartaata mingutsitsinernut aamma taamaattunut allanut illersornissaanut alloriarnerusoq eqqortoq pingaaruteqarluinnartorlu. Tamanna ICC-mi Issittup qanoq ineriartortinnissaanut siunertatsinnut anguniakkatsinnullu naleqqulluinnarpoq, Hjalmar Dahl ICC-p Kalaallit Nunaanni siulittaasua oqarpoq.
Akisussaaffeqanngitsumik mingutsitsineq
ICC-p Alaskami Utqiagvimmi ataatsimeersuarnerani umiarsuit Issittumi akisussaaffeqanngitsumik mingutsitsisarnerat unitsilluinnartariaqartoq eqqartorneqartut ilagigaat, taanna ilisimatitsivoq.
- Mingutsitsinerit taamaattut issittumi avatangiisitsinnut inuussutissatsinnillu isumannaarinninniarnitsinnut imaannaanngitsunik ajoqusiisarnerat unitsilluinnarneqartariaqartoq ataatsimeersuarnermi erseqqisarneqartoq Hjalmar Dahlip ilanngullugu ilisimatitsissutigaa.
ICC-p WWF assigalugu aalajangiinermut nersualaarinnipput, ataasinngornermi aalajangerneq nalunaarutigineqarpoq.