ICC: Naalakkersuisut sallupput

Naalakkersuisut eqqunngitsunik Inatsisartunut paasissutissiisimasut ICC isumaqarpoq. Inuit Ataqatigiit siunersuuteqarput ICC-mut tapiissutigineqartartut amerlineqassasut, itigartitsinermulli tunngaviusut eqqortuunngitsut Kalaallit Nunaanni ICC-mi siulittaasoq isumaqarpoq.

Ukiuni tulliuttuni ICC-mut tapiissutigineqartartut atuukkunnaariartortinneqassapput, 2018-imilu aningaasaliisoqartarunnaassalluni.

Inuit Ataqatigiit siulittaasorigallagaata Aqqaluaq B. Egedep Inatsisartuni siunersuutigaa ICC 2015-imit 2 million koruuninik tapiisarnerit amerlanerulissasut.

Siunersuulli Naalakkersuisunit itigartinneqarpoq, Aleqa Hammondip oqaaseqaatimini oqarluni Canadami ICC-ip aningaasalerneqartarnera 61 procentiusoq.

Tamannali eqqortuunngitsoq ICC-mit oqaatigineqarpoq.

- Takussutissiineruttaaq takutippaa ICC Kalaallit Nunaat ICC-ip immikkoortortaqarfiinut allanut sanilliullugu nammineq aningaasannanniarnermigut angusartagai pitsaanerpaajusut, tamannarpiaavorlu aamma Aleqa Hammondip ujartugaa tassalu ICC Kalaallit Nunaat tamatumuunatigut pikkorinnerusariaqarnerarlugu, Aqqaluk Lynge oqarpoq nangillunilu:

- ICC Kalaallit Nunaat, ICC Canada aamma ICC Alaska ICC-ip ulluinnarni ingerlanneqarneranut
malittarisassai 1998-mi allanngortinneqarnerisa kingorna tamarmik immikkut
aningaasalersorneqalernikuupput. Imaappoq ICC-mi nunat ilaasortat imminnut
pisussaaffeqarunnaarput arlaatigut aningaasatigut tapersersoqatigiinnissamut.

2013-mi ICC Kalaallit Nunaata, ICC Canadap aamma ICC Alaskap naatsorsuutaasa eqikkarlugit
takussutissartai imminnut sanilliullugit uani takussutissiarineqarput.

Aqqaluaq B. Egedep siunersuutaa amerlanerussuteqartunit itigartinneqarpoq, Siumut, Atassut Demokraatillu itigartitsillutik. Inuit Ataqatigiit Partii Inuillu siunersuummut akuersaarput.

Talerpiata tungaani Naalakkersuisut oqaaseqaataat pdf-inngorlugu takuneqarsinnaavoq