ICC-mut aningaasaliissutit Siumup uterteqqikkusunngilai

ICC-mut tapiissutit siornatigutut amerlatigilersillugit qaffanneqassanngillat.

Siumup oqaaseqartartuata Jens Immannuelsenip aningaasanut inatsisip oqallisiginerani tamanna naqissuserpaa.

Amerlineqarnissaannut siunnersuut
Tapiissutit 3 millionit koruunininngaanniit 4 millionit koruuninut qaffanneqarnissaat Naalakkersuisut kissaatigigaat, aningaasanut inatsisissatut siunnersuummi takuneqarsinnaavoq.

- Qaffanneqarnerisigut aningaasat akuersissutit ukiuni siuliinut ICC-p tapiissutigisartagaanut naleqqunnerulerput, aningaasanut inatsisissatut siunnersuummi tamanna oqaatigineqarpq.

Siumup apparneqarnissaat sulissutiginikuuaat
Tamannali Siumup isumaqatiginngilaa:

- Ukiualuit ICC-mut aningaasaliisutit apariartortinnissaat anguniakkatut suliareriarlugu qaffariartinniarneqarnerat akueriuminaappoq uparuartariaqarlunilu, Jens Immanuelsen ippassaq oqallinnermi oqarpoq.

Ikilineqarnissaannut oqallinneq
2014-imi Naalakkersuisuusimasut aningaasaliissutit 5,3 millioninit 4,4 millioninut apparmatigit, ukiullu tulliani 1 millioninik appaqqimmatigit oqallisaangaatsiarpoq.

Ukiut tamaasa aningaasaliissutit 1 million koruuninik ikilineqartarnissaat pilersaarutaagaluarpoq, naggataatigullu atorunnaarsinneqassalluni. Kisianni 2016-imi ikilineqarnerat 400.000 koruuniinnaapput, tassanngaanniillu 3 millionimiiginnarlutik.

Inuit Ataqatigiit sakkortuumik appartitsinernut akerliuinnavinnikuupput. Maanna aningaasaqarnermut naalakkersuisoq, Aqqaluaq B. Egede, 2015-imi aningaasanut inatsimmut atatillugu tapiissutit 2 millionit koruuninik qaffanneqarnissaat siunnersuutigigaluarpaa.

Isumaqatiginninniarnerit sakkortuut
Kisianni Aqqaluaq B. Egede (IA), 1 millioninik qaffaanermut tunngatillugu Siumut sakkortuumik isumaqatiginninniarfiginniarfigisariaqassavaa.

- Aningaasat qaffaassutaasut siunertanut pitsanngorsartariaqartunut nuunneqarnissaat pingaarnersiuinermi ilaasariaqartoq Siumumi isumaqarpugut, tamatumani aningaasat ICC-mut qaffaassutaasussaagaluit 4-mio kr. siunertanut allanut atussavavut, tamatumanimi ICC-mut aningaasaliissutaasut maannakkutut 3-mio. Kr.-ussapput ukiut missingersuuteqarfiusut ilanngullugit, Jens Immanuelsen oqallinnermi oqarpoq.