ICC Kalaallit Nunaata FN-imi sulinini ingerlatiinnassavaa

ICC Kalaallit Nunaata FN-imi suliarisartakkani ingerlatiinnassavai.

Taama ICC Kalaallit Nunaat tusagassiuutinut nalunaaruteqarpoq Inuit Circumpolar Councilsip (ICC-ip) siulersuisuuneri ataatsimeereersullu, ataatsimiinnermi tassani nunat immikkoortortaqarfiit allaffiisa Alaskamiittup, Canadamiittup, Tjukotkamiittup, kiisalu nunatsinniittup suliassaat agguataarneqarput.

- Naalagaaffiit Peqatigiinni sulinissaq nunat inoqqaavisa pisinnaatitaaffii pillugit piginnaatitsinikkut ingerlassat pingasuusut, tassaasut Nalagaaffiit Peqatigiit Nunat Inoqqaavisa Atugaat pillugit Isummersoqatigiiffiat, Naalagaaffiit Peqatigiit Immikkut Ilisimasallit Nunat Inoqqaavisa Atugaannik Nalunaarusiortartut kiisalu Naalagaaffiit Peqatigiit Nunat Inoqqaavisa Pisinnaatitaaffii pillugit immikkut Nalunaarusiortartua qitiutinneqassapput, ICC Kalaallit Nunaata siulittaasua Hjalmar Dahl tusagassiuutinut nalunaaruteqarluni taama allappoq.

ICC Kalaallit Nunaata siulittaasuata, Hjalmar Dahlip, ataatsimiinnermi angusat iluarisimaarpai, pingaartumillu ukiuni sisamani aggersuni nunatsinni ICC-p immikkoortortaanut suliassiissutigineqartut nuannarineqaralugit.

Issittumi Siunnersuisoqatigiinni tassanilu suleqatigiissitaliani arlalinni ilaatigut piujuaannartitsinissaq tunngavigalugu ineriartortitsinermik, assigiinngitsutigullu mingutsitsinermut tunngasunik Issittumilu inuiannut peqqinnarnerusumik avatangiiseqarnissamut atasunik suliaqartut peqatigalugit ICC ilungersuuteqarniarpoq, ICC Kalaallit Nunaat taama nalunaaruteqarpoq.