ICC
ICC-ip ataatsimeersuarnerani Aleqa peqataassaaq
Naalakkersuisut siulittaasuat Aleqa Hammond naalakkersuisoq Martha Lund Olsen peqatigalugu kalaallit 50-illu allat peqatigalugit ICC-ip ataatsimeersuarnerani peqataassaaq
ICC-ip siulittaasuata Aqqaluk Lyngep Inuit Ataqatigiillu Naalakkersuisut annertuumik qaammatini kingullerni isornartorsiortarpaat. ICC-imut tapiissuteqarnerit ukiut ingerlanerini annikilliartortitsinerat tassunga pissuteqarpoq.
Naalakkersuisut siulittaasuat Aleqa Hammond Ilaqutariinnermut Inatsisinillu Atortitsinermut Naalakkersuisoq Martha Lund Olsen, tamarmik Siumumit, Canadami Inuviliassapput tallimanngorpat. Inuit Circumpolar Councilip aqqaneq aappassaanik ataatsimeersuarnerani peqataassapput. Ataatsimeersuarneq juulip 20-anit 24-at ilanngullugu ataatsimeersuartoqassaaq. Aleqa Hammond ataatsimeersuarnermi aamma oqalugiassaaq.
Paarlaanerit
Ataatsimeersuarneq Inuvimmi Canadap avannaani Northwest Territoriesimi ingerlanneqassaaq. ICC-ip siulersuisuini ilaasortaasuni kalaallit allannguuteqassapput. Hjalmar Dahlip Martha Abelsenillu siulersuisuni Aqqaluk Lynge aamma Carl Chr. Olsen, Puju, paarlassavaat.
Kalaallit Nunaanni ICC-ip siulersuisui aamma allannguuteqassapput. Aqqaluk Lynge, Inatsisartuni ilaasortaq Siumumeersoq Karl-Kristian Kruse, Sorlamit Aili Liimakka Laue siulersuisuni ilaasortaassapput. Inatsisartuni ilaasortat Siumumit Doris Jakobsen aamma IA-mit Mimi Karlsen sinniisuussapput. Nuka Kleeman aallartitaasuni siulittaasuussaaq. Siulersuisuni ilaasortanngortut juulip 24-anit atuutilissapput.
ICC-ip ataatsimeersuarnerani kalaallit 50-it missaanniittut peqataassapput.
Ataatsimeersuarnerup saniatigut Aleqa Hammondip Canadami avatangiisinut ministeri Leona Aglukkaq, Issittumi SIunnersuisoqatigiinni aamma siulittaasuusoq, juulip 21-ani ataatsimeeqatigissavaa.