ukiortaami oqaaseqaat
ICC Grønland: 2015-imi anguniagassavut makkuupput
ICC-p Nunatsinni, Canadami, Alaskami Tjukotkamilu immikkoortortaqarfii maanna suliassatik pillugit aaqqissuussereerput, ukiunilu tulliuttuni sisamani suliassatik piareersareerlugit
– Soorunami suliat ingerlaavartut, soorlu toqqaannartumi ataavartumillu Issittumi Siunnersuisoqatigiinni taasumalu suleqatigiiffiini ataqqineqartumik suleqataanitsinnut sunniuteqarnerput ingerlaanassapput.
– Nunarsuarmi nunat inoqqaavisa pisinnaatitaaffii pillugit ICC-p ilungersuuteqarnini nangissavaa, pingaartumik pisinnaatitaaffiit pineqartut nunagisatsinni nunanilu tamalaanni atuutsilersinneqarnissaat eqqarsaatigalugu.
ICC Grønlandip præsidentia Hjalmar Dahl ukiortaami oqaaseqaammini 2014 nalilersorlugu ukiumilu nutaami siumut isigaluni allappoq.
2014-imi taarserartorpassuit
Inuit Issittormiut Siunnersuisoqatigiiffiat (ICC) julimi 2014 Inuvimmi Canadamiittumi ataatsimeersuarpoq. Ataatsimeersuarnerup kinguneraa kattuffiup siulersuisuuneqarfia nutaamik siuttortaarmat aammalu ICC Kalaallit Nunaat siuttortaarpoq nutaanillu siulersuisuisoqalerluni.
Ataatsimeersuarnermi inerniliussap Kitigaaryuinit Nalunaarutip ICC-p siulersuisuuneri, naggueqatigiit Inuit ulluinnarni najugaqarfinni tamani, nunat immikkoortuini nunallu tamalaat akornanni, atugarisaasa sutigut tamatigut pitsanngorsarnissaat anguniarlugu suliareqqusanik assigiinngitsunik pisussaaffilerpai.
– Tamanna ICC Kalaallit Nunaannut aamma imaannanngitsunik unammilligassanik pisussaaffiliivoq Nunatsinni pisortat, soorlu Inatsisartut, Naalakkersuisut, Danmarkimi Nunanut Allanut Ministereqarfik allallu suliffeqarfiit kattuffiillu qanimut peqatigalugit suliarisariaqakkatsinnik, Hjalmar Dahl ukiortaami oqaaseqaammini erseqqissaavoq.
ICC-p Nunatsinni, Canadami, Alaskami Tjukotkamilu immikkoortortaqarfii maanna suliassatik pillugit aaqqissuussereerput, ukiunilu tulliuttuni sisamani suliassatik piareersareerlugit. Kattuffiup siulersuisuunerit januarip qeqqani Nuummi atatsimiissapput, tassanilu Kitigaaryuinit Nalunaarummi suliassiissutit aallaavigalugit suliassat agguataarneqarnissaat aamma eqqartorneqassallutik.