nunatsinnit
ICC aasaru nutaanik siulersuisortaassaaq
Ukiorpassuarni ICC-mi sulisimasut Aqqaluk Lynge aamma Carl Chr. Olsen, Puju, ICC-p nunani tamalaani siulersuisuinit tunuassapput
Aasaru ataatsimeersuarnermi ICC-p nunani tamalaani siulersuisuini Kalaallit Nunaat nutaanik ilaasortaatitaqalissaaq. Tassani Hjalmar Dahlip Martha Abelsenillu ICC-mi ukiorpassuarni sulisimasut Aqqaluk Lynnge aamma Carl Chr. Olsen, Puju, taarsissavaat.
Hjalmar Dahlip Martha Abelsenillu saniatigut ICC-p Nunatsinni immikkoortoqarfia juulip 24-anni nutaarluinnarnik aqutsisoqalissaaq, taakkulu tassaapput Aqqaluk Lynge, Inatsisartunut ilaasortaq Karl Kr. Kruse, Atli Liimakka Laue Sorlammeersoq, sinniisussaralugit Inatsisartunut ilaasortat Doris Jakobsen aamma Mimi Krlsen. Nuka Kleemann aallartartitat siulittaasorissavaat.
Tamanna ICC-p Nuummi maajip 2-anni ataatsimeersuarnerani aalajangerneqarpoq, tassani aasaru inuit ataatsimeersuarnissarsuanni, ukiut sisamakkaarlugit pisartumi, Kalaallit Nunaata peqataanissaa piareersarneqarlunji.
Tusagassiorfinnut nalunaarutikkut ICC allappoq kalaallit aallartitaasa Kalaallit Nunaata Inuit suleqatigiinneranni peqataanera tamakkiisumik tapersersoraat. Tamatuma saniatigut aallartitat kissaatigaat oqartussaasut politikerillu ICC Grønland inuit pisinnaatitaaffiinik kattuffittut namminersortutut ataqqissagaat. ICC-Grønland-p nunat tamalaat isumaqatigiissutaat malissavai, namminerli ulluinnarni aqutsisoqarluni namminerlu siulersuisuminik toqqaasarluni, aallartitanut ingerlatsinermi akisussaasunik.
Piffissami kingullermi ICC-mut tapiissutit tusagassiorfinni sammineqarnerannut atatillugu ICC allappoq ICC-Grønlandip ukiuni kingullerni sisamani aningaasatigut ingerlatsinera aallartitat tamakkiisumik tatigigaat, soorluttaaq naammagisimaaraat ingerlatsinermut qullersat angusarissaarsimanerat, Kalaallit Nunaanni pisortanit tapiissutit killeqaraluartut.
Naatsorsuutit akuersissutigineqaerput ICC-llu nunani tamalaani qullersaanut saqqummiunneqassallutik. Tamatuma saniatigut tapiissuteqartut tamarmik naatsorsuutinik nassinneqassapput, ilaatigut Kalaallit Nunaanni Danmarkimilu oqartussaasut.
ICC-Grønlandip aallartitaanut peqataatitaqarput Timersoqatigiit Kattuffiat, SIK, KNAPK, IMAK, Nunatsinni Perorsaasut Kattuffiat, EPI, Eqqumiitsuliortut Pilersitseqqaartut Ingerlatsisullu.
Aallartitat neriuutigaat Kalaallit Nunaat inunnut allanut isumassarsiortitsiuaannassasoq, inassutigalugulu oqartussaasut suleqateqarnerat ataatsimuussuseq immikkut ittoq taanna ataqqillugu pissasoq.