IA: Pele, aningaasat suminngaannit aaniarpigit?

Peter Olsen isumaqarpoq, Partii Naleraq talerpimmut sangoriangaatsiarsimasoq, ilaatigut ingerlatseqatigiiffinnut akileraarutip annertuumik appartinnissaanik siunnersuuteqarnermigut

IA isumaqarpoq, Partii Naleqqap ingerlatseqatigiiffinnut akileraarutip affaannanngortinnissaanik kissaateqarnermigut isummat tunngavigisani sumiginnarai.

Siusinnerusukkut oqaluttuarisatsitut, Aningaasaqarnermut Naalakkersuisup, Pele Brobergip (PN) ingerlatseqatigiiffinnut akileraarutit annertuumik appartinnissaannik pilersaarutini aalajangiusimavai. Naak ingerlatseqatigiiffinnut akileraarutit affaannanngortinnissaat ukiumut 130,5 millioner koruunit aamma 187,5 millioner koruunit akornanni akeqassagaluartoq.

AAMMA ATUARUK:

Suliffeqarfinnut akileraarutip affaannanngortinneqarnissaa 150 millioninik naleqassaaq

Peter Olsenip (IA) naatsorsuinermini aningaasat appasinnerusumiittut toqqarpai, tassa 132 millioner koruunit. Taakkua piffissami ukiunik sisamanik sivisussusilimmi 528 millioner koruuninngussapput.

- Pele Brobergimut apeqqutigerusupparput suut sipaarutaassanersut nunatta karsiata ukiuni sisamani 528 mio.kr aannaasaqaatigisalissappagit? Suut pilliutaassappat? Aamma qanoq qulakkeerumavaa aningaasat isertitat ikilissanngippata allatigut isertitsinissaq? Akileraarut affaannanngortinneqarpat qanoq sinerissami kiffartuussinermut sunniuteqassava? Peter Olsen (IA) tusagassiuutitigut nalunaarummi allappoq.

AAMMA ATUARUK:

Pele Broberg: Ingerlatseqatigiiffinnut akileraarut malunnaateqassaguni appangaatsiassaaq

Pele Brobergip (PN) aningaasat suminngaanneernissaat maannamuugallartoq oqaatigisinnaanngilaa, oqaannarlunili, ingerlatseqatigiiffinnut akileraarummik appartitsineq suliffeqarfinnik akileraarusersuinerup aaqqissuuteqqinneqarneranut ilaassasoq.

Taamali oqartoqarnera Peter Olsenip (IA) naammaginngilaa.

- Missingersuusiortarneq pillugu inatsit naapertorlugu qinikkatut akisussaassuseqartut sipaakkat allatigut qanoq matussuserneqarnissasut siunnersuuteqartussaavoq. Matumani tamanna qulakkeerneqarpa?

- Naggataatigullu apererusunnarsivoq partiip siulittaasua Hans Enoksen sumiinnersoq. Hans Enoksenip partiip aallartissimasami talerpimmut sangoriangaatsiarsimanera isumaqataaffigisinnaanerpaa? Minnerunngitsumillu apeqqutaalerpoq Aningaasaqarnermut Naalakkersuisup talerperliunerungaatsiartumik anguniagaqarnera partiiminiit politikkikkut tapersersorneqarnersoq?

Powered by Labrador CMS