Inuusuttut Ataqatigiit

IAp Inuusuttaat: Inuusuttorpassuit suliffissaaleqisuunerat aarlerinarpoq

Inuusuttorpassuit suliffissaaleqinerat atugarissaarnermut eqquinerlussinnaasoq Inuusuttut Ataqatigiit siulittaasuat Múte Bourup Egede oqarpoq

Kalaallit Nunaanni inuusuttorpassuit suliffissaaleqinerat aarlerinartuusoq, Múte Bourup Egede oqarpoq

- Inuusuttut Ataqatigiit upernaap ingerlanerani arlaleriarlutik inuusuttut suliffissaaleqinerujussuat aarlerinartillugu saqqummiuttarnikuuarput. Ajornartorsiutaavoq aaqqinneqartariaqartoq.

Inuusuttut Ataqatigiit siulittassuat Múte Bourup Egede tusagassiutinut nalunaarummi allappoq.

Naatsorsueqqissaartarfiup kisitsisaataani takuneqarsinnaavoq, aggustimi ukioq kingullermut sanilliullugu suliffissaaleqisut 181-nik ikilisimasut.

- Suliffissaaleqisuni 3.167-iusunit 18-iniit 34-nut ukiulliit 1.446-pput, procentinngorlugu 46 procenterluinnangajaallutik. Inuusuttut sulifissaaleqisut amerlavallaarujussuarput arlaanillu ajortoqarneranik kisitsisit takussutissippaatigut. Maanna inuusuttut taamak amerlatigisut suliffissaaleqiunnaarlutik sulileqqinnissaat anguniarlugu iliuuseqartoqartariaqalerpoq, Múte Bourup Egede oqarpoq.

Suliniutit
Suliffissaaleqineq pillugu aaqqiigallattarnerit atorunnaarlugit siunissamut iluaqutaasunit aalajangiisoqartalertariaqartoq Inuusuttut Ataqatigiinnit oqaatigineqarpoq.

- Suliffissaaleqinermik ajornartorsiuteqarnerup tamakkiisumik suleqatigiiffiulluni aaqqivigineqarnissaa anguneqartariaqalersoq isumaqarpugut. Kaammattuutigerusupparput Namminersorlutik Oqartussat, kommunit, inuussutissarsiortut susassaqartullu allat ataatsimoorlutik suliffissaaleqinerup aaqqiiviginissaanut tigussaasunik aaqqissutissanik ujartueqatigeeqqullugit. Minnerunngitsumillu inuusuttut suliffissaaleqinerujussuannut aaqqissutissanik nassaaqqullugit, Inuusuttut Ataqatigiivisa siulittaasuat oqarpoq.

Powered by Labrador CMS