Kanukokamit anineq

IA: Wæver sakkortuumik saassussivoq

Simumi siulittaasup tulliata Jørgen Wæver Johansenip Sermersooq, ingammik IA ersoqatiginninnginnerarlugu isornartorsiopai. IA maanna isornartorsiuinermut akissuteqarpoq

Kommuneqarfik Sermersuumi Inuit Ataqatigiit ilaasortaatitaanni siulittaasoq, Malene Lynge

Kommune Kujallermi borgmesteri aamma Siumumi siulittaasup tulliusoq, Jørgen Wæver Johansen, Kommuneqarfik Sermersooq uani sapaatip akunnerani sakkortuumik isornartorsiorpaa, kommunalbestyrelsi kommunit kattuffianit Kanunkokamit aninerani ersoqatiginninnginnerarlugu.

Kommuneqarfik Sermersuumi kommunalbestyrelsimi ilaasortap, Malene Lyngep (IA), maanna Siumup siulittaasuata tullianit isornartorsiuineq akissuteqarfigaa.

Avissaartuutsitsisoq
Inuit Ataqatigiit gruppiata Jørgen Wæver Johansenip saassussinera tupigusuutigigaat taanna oqarpoq.

- Aatsaat taamak partii tamakkiisoq sinnerlugu inummullu aalajangersimasumut taamak sakkortutigisumik saassutarinninnermik takuvugut. Tamanna kusananngilaq ileqqorlunnerullunilu ataasiinnarmik siunertalik, tassalu avissaartuutitsinissamik, Malene Lynge allappoq.

Malene Lyngep kommuni ersoqatigiittuunerarpaa erseqqissarlugulu, maanna Sermersooq 2018-illu naanissaata tungaanut ukiumut millioninik pingasunik kisitsisitalinnik akiliisussaasoq.

– Assigiissaarinermik piumasaqaammut naammassinninniarluni naligiinnerusumillu atugaqarnissamik pilersitsiniarluni aningaasaliineq. Tassa ersoqatigiinneq, kommunimi politikeri erseqqissaavoq.

Atuaruk: Sermersooq Kanukokamut: Qujanaq isumassuinissinnut - uagut sapinngilagut

Amerlanerussuteqartut
Taassuma ilanngullugu oqaatigaa, Kanukokamit aninissap aalajangiunneqarnera amerlanerussuteqartut tunuliaqutaralugit ingerlanneqartoq.

- Kommuneqarfik Sermersuumi Inuit Ataqatigiinneersut Kanukokap atuuffianik naliliisarsimapput, taamaasillunilu aalajangiineq demokratiskiusumik ingerlaaseqarluni ataatsimoorfiusumik aalajangiineruvoq. Aalajangiineq tamanna Kommunalbestyrelsep aalajangiisarnerini aatsaat taamak paasissutissanik tunngavigissaartigisumik pivoq – qaammatit aqqaneq-marluk ingerlaneranni ingerlanneqarsimasoq, Malene Lynge allappoq.

Sermersuumi kommunalbestyrelsimi amerlanerussuteqartut ataatsimiinnerminni kingullermi, 2016-imut Kanukokamut akiliutissaagaluami annertoqataanik 4,2 millionit koruuninik meeqqanut, inuusuttunut ilaqutariinnullu pissakilliortunut atugassiivoq.

Aamma atuakkit:

Kanukokap Sermersooq qinnuigaa: Kalaallit Nunaanni ataatsimooqatigiinnermit aninak

Sermersooq Kanukokami ilaasortaajunnaarpoq

Powered by Labrador CMS