IA tunuliaqutaralugu qinigassanngortittoq: Oqartussaaqataaneq toqqaannarnerusariaqarpoq

Kalaallit Nunaanni kikkut tamat oqartussaaqataanerat nutarterneqartariaqartoq Inuit Ataqatigiit tunuliaqutaralugit qinigassanngortittoq Aputsiaq Bllytmann isumaqarpoq.

- Danskit demokratiianiit issuagaannaavoq killiliivallaarlunilu. Ukiut sisamakkaarlugit oqartussaaqataanerput inunnut 31-nut tunniuttarpagut naatsorsuutigalugulu innuttaasut amerlaneri sinnerlugit issiasoqartoq. Qinigaaffik naaqqammersoq eqqarsaatigigaanni: taarseqattaareermata naggataatigut innuttaasut affai ataaterujussuarlugit inatsisartuni sinnerneqarput, Aputsiaq Blytmann oqarpoq.

Toqqaannarnerusumik aaqqiissuteqarneq
Kikkut tamat oqartussaaqataanerat toqqaannarnerusumut nikisinneqartariaqartoq isumaqarpoq. Inatsisartuni ilaasortaasut 31-nit 25-nut ikilineqartariaqartut isumaqarluni.

- Qinersisartut siunnersueqatigiiffianik pilersitsisoqassaaq. Siunnersueqatigiiffiup suliassarissavaa innuttaasuniit siunnersuutinik tigooraasuunissartik, inatsisartunullu suliassanngortinnissaannut piginnaatitaaffilerneqassalluni. Inatsisartunut ingerlateqqinnissaannut piumasaqaateqassaaq ilusilersornissaanut taperserneqarnissaanullu. Pisariaqassappat siunnersueqatigiiffik ilusilersuinissamut tapersersorneqarneranillu misissuisuunissamut akisussaasinnaapput. Siunnersuutip tapersersorneqarnerata misissornera ingerlanneqarsinnaavoq atsiortitsisaqattaarnikkut innuttaasunilluunniit taasititsinikkut.

Aputsiaq Blytmann 29-nik ukioqarpoq siullermeerlunilu Inatsisartunut qinigassanngortilluni.

- Qinersisartut siunnersueqatigiiffiat suliakkerneqassaa atsiortitseqattaariaasit taasititseriaatsilluunniit teknologi atorlugu sakkussanik akikittunik ajornanngitsunillu pilersitsinissamut, oqarpoq.

Siunnersuisooqatigiiffik ima ingerlanneqassaaq
Qaavatigut oqallinerit qarasaasiakkut eqaatsumik ajornanngitsumillu ingerlanneqarnissaat Aputsiaq Blytmann isumaqartpoq. Isumannarniarlugu oqallittarfimmik pilersitsisoqarnissaa siunnersuutigaa, oqallinneq nutaarsiassaleriviit avataanni ingerlanneqarniassammata.

- Siunnersuisooqatigiiffimmi qassit issiasassappat aamma kikkut tassani issiassanersut aalajangertassavaat?

- Qinersisartunit aalajangerneqartassapput. Kommunit tamarmik ilaasortaatitaqarnissaat siunnersuutigisinnaavara. Siulittaasoq ilanngullugu ilaasortaasut tallimaassapput. Ilaasortanit siulittaasorineqartussaq qinerneqartassasoq siunnersuutigissavara, Aputsiaq Blytmann oqarpoq, ilaasortaasullu ukiuni marlunni ilaasortaasassasut siunnersuutigalugu.

Islandimi periutsit
Inuit siunnersueqataanissaat anguniarlugu taamaattumik pilersitsisoqartariaqartoq isumaqarpoq.

- Ingerlanneqarnera akisusariaqanngilaq. Nunami naalakkersuinikkut aaqqissuussineq pillugu Islandimi innuttaasut oqallitsinneqarput 2012-mi qinersissutigineqartumik. Oqallinnerit Facebookikkut ingerlanneqarnerupput. Siunnersuisooqatigiit aalajangertassavaat oqallisigineqartoq ingerlateqqinneqassanersoq, Aputsiaq Blytmann oqarpoq.