piumasaqaat
IA Svend Hardenbergimut isornartorsiuivoq: Annertuumik kusanaatsuliortoqarpoq
Qaffasinnerpaamik atorfilittap Svend Hardenbergip Folketingimi ilaasortaasimasumut Nick Nielsenimut oqaluttarfimmiit oqaaserisimasaanut tunngatillugu eqqunnginneraanissamik peqqusisimanera akuerineqarsinnaanngilluinnartuusoq IA-mit oqaatigineqarpoq
(Allaaserineqartoq nalunaaqutaq 16.32 nutarterneqarpoq, tassani Svend Hardenbergip oqaasii ilanngunneqarlutik)
Naalakkersuisut aamma Naalakkersuisut siulittaasuata Naalakkersuisoqarfiani pisortaq Svend Hardenberg tatineqarnerat annertusiartorpoq.
Aviisi AG sapaatip matumani saqqummersumi allappoq Nick Nielsen tamatumani pilliutigineqarsimagunartoq, Folketingimi innersuussutigigamiuk qallunaat nunanut allanut tunngasunut ministeriat Martin Lidegaard aamma nunanut allanut tunngasunut naalakkersuisoq Vittus Qujaukitsoq oqarsimasut qallunaat kalaallillu naalakkersuisui Pituffimmut tunngasumi suleqatigiissimasut. Taamatut oqarnera Svend Hardenbergip Kim Kielsen sinnerlugu emailikkut tunuarteqquaa, taannalu sapaatip akunnerani kingullermi AG-p ilannguppaa. Nick Nielsenili taamaaliorumanngilaq.
Tamanna Inuit Ataqatigiinnit isornartorsiorneqarpoq.
IA: Pisoq akuerineqarsinnaanngilluinnarpoq
- Namminersorlutik Oqartussani atorfilittaq qaffasinnerpaamik inissisimasoq qinikkanit toqqaannartumik piumasaqaateqarsimara annertuumik kusanaatsuliorneruvoq, tamatumalu partiit sinnerinit annerusumik aallunneqannginnera tupigusuutigaarput, Inuit Ataqatigiit tunuliaqutaralugit Inatsisartuni ilaasortaq Aqqaluaq B. Egede oqarpoq.
- Qaffasinnerpaamik atorfilittap Svend Hardenbergip Folketingimi ilaasortaasimasumut Nick Nielsenimut oqaluttarfimmiit oqaaserisimasaanut tunngatillugu eqqunnginneraanissamik peqqusisimanera akuerineqarsinnaanngilluinnarpoq. Tamannalu tusagassiutit ilumuussappata allaat namminerisamik mailiminit nassiussimavaa. Oqallinnermi Nick Nielsen Namminersorlutik Oqartussat imaluunniit Naalakkersuisut sinnerlugit oqaaseqanngilaq, partiinili sinnerlugu oqaaseqarluni. Namminersorlutillu Oqartussat Naalakkersuisulluunniit partiit oqaaseqartitaanut akuliussinnaanngillat, kikkulluunniit pissaanermik tigumminnittuugaluarpata, Aqqaluaq B. Egede oqarpoq.
Naapertuuttumik sulisoqanngitsoq
Nick Nielsen kukkusumik oqaaseqarsimasoq Naalakkersuisut isumaqarfigigunikku taava namminneq avammut tamanna oqaaseqarfigissagaat Inuit Ataqatigiinnit siunnersuutigineqarpoq, tassanilu qanoq isumaqarnerminnik nassuiaallutik.
- Naalakkersuisut atorfilittamik qinikkamut piumasaqaatitalimmik oqariartoqqusisinnaanngillat, Aqqaluaq B. Egede oqarpoq. Oqaatigaalu Naalakkersuisut siulittaasuata ilisimasariaqaraa qinikkat, Inatsisartuniippata, kommunalbestyrelsiniippata imaluunniit Folketingimiippata, Namminersorlutik Oqartussaniit ilumuunnginneraallutik oqaaseqarnissaannik piumaffigineqarsinnaanngimmata. Tamanna pissaanerup pingasoqiusatut agguataarsimaneranut naapertuutinngitsoq IA-mi politikkerip oqaatigaa.
Svend Hardenberg oqaaseqarusunngitsoq
Naalakkersuisut siulittaasuata Naalakkersuisoqarfiani pisortap Svend Hardenbergip apersorneqarnissaa Sermitsiaq.AG-mit sulissutigineqaraluarpoq. Aaqqissuisoqarfimmit paaserusunneqaraluarpoq Svend Hardenbergip Nick Nielsenip ilumuunnginneraanissaanik siunnersuuteqarsimanini uggorineraa.
Svend Hardenbergili Sermitsiaq.AG-mut mailimik ima allappoq:
- Pisoq pillugu paragraf 37 naapertorlugu apeqquteqartoqarpoq (Inuit Ataqatigiinnit Aqqaluaq B. Egedemit), apeqquteqaatillu akineqarnissaa sulissutigineqarpoq. Allanik apeqquteqartoqassappat Naalakkersuisut siulittaasuat innersuutiinnassavara.
Svend Hardenbergip Nick Nielsenimut Vittus Qujaukitsumullu mailimik Naalakkersuisut siulittaasuat Kim Kielsen sinnerlugu nassiussisimanini AG-mi sapaatip akunnerani kingullermi nassuiaatigaa.
Naalakkersuisut siulittaasuata Kim Kielsenip Siumumeersup oqaaseqartinneqarnissaa Sermitsiaq.AG-mit sulissutigineqarpoq.
AG-mi allaaserineqartut 'IA-p atorfilittat politikerimut peqqusinerat tupigusuutigaa' aamma 'Nick Nielsen: Naalakkersuisut siulittaasuat Kim Kielsen kisermaassiniarpoq' aviisimi atuarneqarsinnaavoq. Aviisi uani pisiarineqarsinnaavoq: