IA: Siunnersuutigineqartoq eqqoriaanermik aallaavilik atorneqarsinnaangilaq

- Aningaasaqarnermut Naalakkersuisup Vittus Qujaukitsup kommunerujussuit aningaasanik nammineerlutik aalajangersaasinnaanerat, kiisalu ukiunut tulliuttunut akisussaassuseqarluartumik missingersuusiorsinnaanerat aserorternialerpaa.

Kommuneqarfik Sermersuumi Inuit Ataqatigiit isornartorsiuipput.

- Kommunalbestyrelset sulinerat innuttaasunut akisussaassuseqartumik kiisalu sullissilluarnermik ilaqartitaq anguniarneqartuaannarpoq, ukiunut tulliuttunut aningaasanik immikkoortiterinissaq, taakkuali artukkernagit piviusunngortittarnissaat ilaatinneqartuaannarluni. Naalakkersuisut nutaamik agguaasseriaatsimik siunnersuuteqarnerat kommunerujussuit sisamaasut ukiumoortumik akisussaassuseqartumik missingersuusiortarnerannut ajoqutaasumik kinguneqassaaq, piviusorsiunngilluinnarmat, IA-mit oqaatigineqarpoq.

Naalakkersuisut eqqoriaasut
Kommuneqarfik Sermersuumit oqaatigineqarpoq 'Siunnersuutigineqartoq eqqoriaanermik aallaavilik atorneqarsinnaangitsoq'.

- Siunnersuutigineqartup anguniagarilluinnarpaa innuttaasut Ittoqqortoormiut, Tasiilarmiut, Paamiormiut Nuummiut, aammalu nunaqarfimmiuvi tamaasa ilanngullugit eqqorneqalersut borgmestereqarmata partiimik allamik aggersumik, Kommuneqarfik Sermersuumi IA sinnerlugit Mille Søvndahl Pedersen oqarpoq.

Kalaallit Nunaata tamaat ineriartorfiunissaa kissaatigineqarpoq.

- Oqalliseqataarusoqaagut agguaasseriaatsip nutarterneqarnissaanut, kommunerujussuillu sisamaasut akornanni akileraartarnikkut pissutsit ilanngullugit Naalakkersuisut tikillugit. Oqallinnermut ilaatinneqarluinnassaaq piviusunik pigisanik nalunnginninnermik aallaaveqarneq. Oqallissutit kingunissaat angusaallu, sivisuumik akisussaasseqartumik atuutsinneqassapput, Mille Søvndahl Pedersen oqarpoq.

Siumut sinnerlugu Inatsisartunut ilaasortaq Anders Olsen nalimmassaarinermut aqqissuusseqqinnissaq pillugu oqallinnermut akuliuppoq. Taassuma piumasaraa nammminersorlutik oqartussat suliffeqarfiutaanni sulisut akileraarutaannit Kommuneqarfik Sermersuup isertitai saqqummiunneqassasut.

Nalimmassaarinermut aaqqissuusseqqinnissaq suli akuersissutigineqanngilaq. Pilersaarutaavorli aggustip 11-at nallertinnagu isumaqatigiissusiortoqareersimassasoq.