IA siunnersuuteqarpoq: Illoqarfiit qanittuini uranisiortoqassanngilaq

Ataasinngornermi Inatsisartut ataatsimiinneranni urani oqaluuserineqaqqittussanngorpoq.

Tassami aatsitassarsiorfinni radiup qinngorneranik 60 ppm-inik akoqarnerusunik qalluiffiusuni aalajangersimasumik illoqarfinnut, nunaqarfinnut imeqarfinnullu tasernut 50 kilometerinik isumannaallisaanikkut killeqarfiliisoqarnissaanik Naalakkersuisut ataatsimut aalajangersagaliornissamik peqquneqarnissaannik Inatsisartuni aalajangiiffigisassatut, Aqqaluaq B. Egede Inuit Ataqatigiinneersoq siunnersuuteqarpoq.

Inuit nuunneqarnissaat akisussasoq
- Inatsisitigut immitsinnut illersiunngikkutta taava qanoq inuit peqqissusaat, avatangiisit uumassusillillu ataatsimut innarlerneqannginnissaat qulakkiissagatsigu?, taanna siunnersuummini aperivoq.

Illoqarfinni, nunaqarfinni savaatilinniluunniit qanittuni innuttaasut radiup qinngorneranik akoqartunik aatsitassarsiorfeqanngitsunut peqqinnissakkut isumannaannerusunut nuuttariaqalissagunik, innuttaasunut akisuallaassasoq, Aqqaluaq B. Egede isumaqarpoq.

- Siunnersuut manna atorlugu nunaqarfikkaanik nuussinissaq pinngitsoortinneqassaaq, IA-mi politikeri erseqqissaavoq.

Atuaruk: Urani pillugu taasisitsisoqarnissaa innuttaasut amerlanerussuteqartut kissatigaat

Ersarissunik sinaakkutassanik ujartuisoq
Naalakkersuisut tunngaviusunik sinaakkutissatigut malittarisassaqannginnerat, Aqqaluaq B. Egedep isornartorsiorpai.

- Inuit uumasut avatangiisivullu oqaasiinartigut innarlitsaaliorumasavut, isumaannatsigullu illersorneqarsinnaanngillat. Erseqqissumik maleruagassiortoqartariaqarsoraara, taamaaliornikkut sinaakkutissaqalissammat sanioqqutaarneqarsinnaanngitsunik. Inatsisillu tassaalertariaqarput uatsinnut illersuisut, Aqqaluaq B. Egede oqarpoq.

Atuaruk: ‘Narsaq tassaasariaqanngilaq qinngornernik ulorianartunik eqqaaviusoq’