IA siunnersortinik atorfinitsisarnermut paasisaqarnerorusuppoq

Demokraatit isumaqartut Naalakkersuisunut ilaasortat immikkut siunnersorteqarsinnaanerannut kaajallaasitap periarfissiisup atorunnaarsinnissaa Naalakkersuisut eqqarsaatigisariaqaraat, Inuit Ataqatigiit tusarusuppaat politikkikkut siunnersortit atorfinitsinneqarnerminni pinerluuteqarsimannginnermut uppernarsaammik tunniussinissaminnut pisussaaffilerneqarsimanersut.

Tamanna pivoq Naalakkersuisunut paragraf 37 najoqqutaralugu Inatsisartuni ilaasortap, Inuit Ataqatigiinnersup Aqqaluaq B. Egedep apeqquteqaateqarneratigut.

Aqqaluaq B. Egedep tusarusuppaa ‘Naalakkersuisut politikkikkut siunnersortigisaat nunatsinni sulisartut amerlasuut piumaffigineqartarnerat assigalugu pinerlussimannginnermik uppernarsaammik tunniussisimanissaminnik piumaffigineqartussaanersut’.

Atuaruk: D Naalakkersuisunut: Siunnersortit atorunnaarlik

Tamanna pivoq Pinngortitamut, avatangiisinut inatsisinullu atuutsitsinermut naalakkersuisup, Atassummeersup Mala Høy Kukop, politikkikkut siunnersortaa, Gerth Platou Jacobsen, ingerlaannartumik atuutilersumik sapaatip akunnera kingulleq suliunnaareersorlu Aasianni politiini pisortaanermi nalaani sakkortuumik nakuusersimasutut 2010-mi eqqartuussaasimanini qaqilerneqareersorlu.

Gerth Platou Jacobsenip ingerlaannartumik atuutilersumik soraareernerata kingorna Mala Høy Kukop Radioaviisimut ilisimatitsissutigaa nammineq Gerth Platou Jacobseni politikkikkut siunnersortissamisut atorfinitsileramiuk pinerluuteqarsimanersoq paasiniaavigisimanngikkini.

Taamaammat Aqqaluaq B. Egedep ilanngullugu aamma tusarusuppaa Naalakkersuisut pingaartinneraat pinerluuteqarsimanngitsunik atorfinitsitsisarnissaq, taamaassimappallu qanoq pingaartitsineq timitalerniarneqarnersoq.

Atuaruk: Naalakkersuisup siunnersortimi eqqartuussaasimanera tupaqqassutigigaa