IA sinnerlugu qinigassanngortittoq naartuersitsineq pillugu: Maniitsumi misilittagarineqartut atorneqalerlik

Atassutip Inuusuttaasa siulittaasuat Inatsisartunut qinersinissamut sassartup Mausana Pearyp kissaatigisaasa ilagaat ilinniagaqarnersiutit qaffanneqarnissaat.

Naartuersittartut assersuutigalugu akiliuteqartalernerisigut ilinniagaqarnersiutinik qaffaasoqarsinnaasoq siunnersuutigaa.

- Aningasat naartuersittartunit aarusuppagut. Ilisimavarput arnat 1000-it missaat ukiumut naartuersittartut, naartuersinnerlu ataaseq aamma 10.000 koruuninik inuiaqatigiinnut akeqartartoq. Tassa imaappoq peqqinnissaqarfiup ukiumut 10 million koruunit missaat naartuersittartunut aningaasartuutigisarpaat, Masauna Peary, Sermitsiaq.AG-mut ataasinngormat oqarpoq.

Inuit Ataqatigiit siunnerlugit Inatsisartunut qinigassanngortittup Aputsiaq Blytmannip naartuersittartut akiliisalernissaannut siunnersuut isumaqatiginngilaa.

Maniitsumi misilittakkat
Paasissutissiinerit annertusisariaqartut Aputsiaq Blytmann isumaqarpoq.

- Naartuersittarneq annikillisarneqassappat akiliisitsisarneq atornagu isumaqarpunga paasititsiniaaneq pinaveersaartitsinerlu atornerusariaqartut. Assersuutigalugu Maniitsumi naartuersittartut ikilerujussuarnikuupput toqqaannartumik ataavartumillu inuusuttunut saaffiginnittumik paasititsiniaanikkut. Misilittakkat taamaattut nunatta sinneranut siaruaanneratigut naartuersittarneq millisarneqarsinnaavoq, Aputsiaq Blytmann tusagassiutinut nalunaarummi oqarpoq.

- Isumaqarpunga naartuersinniartoq artornareeqisumik aaliangernikoq artukkerneqaqqittariaqanngittoq akiliisitaanikkut. Akiliisitaaneq pinerlunnermut attuumassuteqartinneqartarpoq, naartuersittorlu pisariaqartinngilaa taamatut misigititaanissaq, Aputsiaq Blytmann oqarpoq.

- Arnat angutillu akornanni naligiisitaanermut isumannaanavianngilaq. Naartulertoqaraangami inuit marluk iliuuserisaanik kinguniusarpoq, arnarlu kisimi 'pillarneqartassappat' pissusissamisuunngilaq.

Aaqqissuusseqqinnerit
Ilinniagaqarnersiutinut qaffaaniarnermut tunngatillugu inulerinerup iluani tamakkiisumik aaqqissuusseqqinneqarneratigut aaqqiivigineqartariaqartoq Aputsiaq Blytmann isumaqarpoq.

- Ukiut ingerlaneranni pisartakkat ataasiakkaat isiginiarneqartarnikuupput, taamaatumillu inatsiseerarpassuit imminnut naalleraattutullusooq ilinikuullutik, Aputsiaq Blytmann oqarpoq nangillunilu:

- Inuiat Ataqatigiinninngaanniit piareersimavugut aaqqissuuseqqinnermut peqataanissatsinnut. Siunnersuutersilu imatut paasivara Atassutip Inuusuttortai aaqqissuusseqqinnissamut siunnerfeqartut, tamannalu isumaqaataaffigaara.