qinersineq
IA-mit qinigassanngortittoq: Aningaasat atugarissaarnermut atorneqarlik
- Nunatsinni suliffissaaleqisorpassuaqarlunilu ajornartorsiuterpassuaqarpoq. Qaqortumi timmisartoqarfiliornani aningaasat taakkununnga atorneqarlik, Inatsisartunut qinersinissamut qinigassanngortittoq IA-mit Naja Lund oqarpoq
Qaqortumi mittarfittaarniarneq unitsiinnarneqassanngitsoq Demokraatit siulittaasuata Anda Uldumip siunnersuutigaa, tamanna Sermitsiaq.AG-mi pingasunngornermi allaaserineqarpoq.
- Demokraatit ilungersorluni Qaqortumi timmisartunut suluusalinnut mittarfiliornissamut aningaasaliissutissanik ujaaseqataassaagut. Ilungersorluta anguniassavarput, Anda Uldum oqarpoq.
Inatsisartunut qinigassanngortittoq Inuit Ataqatigiinneersoq Naja Lund timmisartoqarfiliornissamit aningaasat pitsaanerusumik atorneqarsinnaasut isumaqarpoq.
- Aningaasarpassuit mittarfiliornernut atornagit inuiaqatigiit nukittorsarnissaannut katsorsarnissaannut, meeqqat angerlarsimaffiup avataanut inissittakkat angerlarsinnaalernissaannut ilaqutariit tamakkerlugit katsorsartinnissaannut aningaasat atortigit, Naja Lund oqarpoq.
Angallannermi tulluarsaanerit
Qaqortumi mittarfeqalissappat Qaqortumi innuttaasut kisimik iluaqutigissagaat Naja Lund isumaqarpoq.
- Qaqortoq angallannikkut kisimi ajornartorsiuteqanngilaq. Kujataani illoqarfinni, Qeqertarsuup Tunuani aamma Tunumi tamanna ajornartorsiutigineqarpoq. Angallannermi tulluarsaanikkut aaqqissuussisoqarsinnaavoq pitsaanerulersillugu, angallannermi mittarfiliornikkut kisimi pitsanngorsarneqarsinnaanngilaq, Naja Lund oqarpoq.