IA-mit politikkeri: Politikkikkut aaqqissuisoqarnissaa piffissanngorpa?

- Nassuerutigisariaqarpara, qaammatini kingullerni nunatsinni politikkikkut ingerlatsineq politikeriulluni naammaannakujussimammat. Nuanninngitsunik pitsaasunillu pisoqartarsimavoq, nunaniitsulli amerlanerullutik.

Kommuneqarfik Sermersuumi kommunalbestyrelsimi ilaasortaq Allan Pertti Frandsen, Inuit Ataqatigiit, Naalakkersuisut ajalasoornerat pillugu oqallissaaraluni allappoq.

- Benjamiimut Sakæusimut, sinerissamilu innuttaasunut Naalakkersuisut uppinnerat, aammalu uppinnissaasa tungaanut ingerlanerat, ungasissutut, tupinnartutullu misiginarsimassaaq. Kanngusuusaarnaqaarlumi.

- Politikeritut sallugutta, karsimilluunniit aningaasanik tigusilluta – imaluunniit taakku tamaasa – inuiaqatigiit politikkimut, politikerinullu isiginninnerat innarlissavarput. Naggataatigut inuit eqqarsarluarsinnaasut pisortani, Namminersorlutik Oqartussani kommuniniluunniit suliffissarsiornissartik ornigiunnaassavaat. Nunatsinni pikkorinnerit, ingammik inuusunnerusut, maanna nunanut allanut qimarrallutik suliffissarsiortalereerput. Taamatumani namminersorluni inuussutissarsiuteqarneq eqqorneqarpoq, tassanilu inuiaqatigiit ineriartornissaannut isumassarsiat nutaat pilertaraluarput. Uagullu politikerit ineriartornermut pitsaanngitsumut akisussaanerpaavugut, Allan Pertti Frandsen allappoq.

Pitsanngorsaanerit
Politikkerit imminnut qiviarsinnaasariaqattut oqarpoq.

- Uagut nammineq, qanigisagullu pisuunngortinniarlugit? Politikeriuneq inuussutissarsiutigiumallugu? Imaluunniit allannguinernik, pitsanngorsaanernillu oqimaatsunik pisarialinnilli, inuiaqatigiinnut tamanut iluaqutaasussanik iliuuseqarniarluta?, IA-mi sinnerlugu politikkeri aperaaq.

- Uanga isumara - Inuit Ataqatigiillu isumaat – tassavoq politikkikkut pissaanermik tigumminninnerup atugaannaasarnera. Tigummineralu killissaqartoq. Ullut ilaanni allanit ingerlatitseqqittussanit tiguneqartussaavoq, taakkulu inuiaqatigiinni pitsanngorsaanerit ingerlateqqittussaavaat. Nunatsinnili politikkikkut suliaqartut akornanni qimerluuininni, takusinnaavara taama isumallit amerlavallaanngitsut. Eqqortorli unaavoq iliuutsigut pillugit eqqartuunneqartussaavugut.

- Politikeritut akueralugulu takusariaqarparput, inuiaqatigiit akornanni pissutsinut siuttuusussaagatta, ingerlatsinitsinnilu pingaartillugit aallaavigissagatsigit naligiinneq, ataqatigiinneq, namminersornerlu. Pingaartitagut sumiginnarutsigit, uatsinnuinnaq sumiginnarata aamma nunarput sumiginnassavarput, Kommuneqarfik Sermersuumi kommunalbestyrelsimi ilaasortaq Allan Pertti Frandsen oqarpoq.