aalisarnermut inatsit
IA-mit piumasaqaat: Aalisarnermut inatsisip kingunissai inississapput
IA-meersup Hans Aronsenip ''aalisarnermut inatsit tunngavigalugu aaqqissuusseqqittoqassappat avaqqukkuminaatsuusoq aaqqissuusseqqinnerup kingorna aningaasaqarnikkut qanoq kinguneqarnissaata qulakkeersimaneqarnissaa'' oqaatigaa.
Aalisarnermut ataatsimiititaliami siulittaasoq, Hans Aronsen, tusagassiuutinut nalunaarummi taama allappoq. Aalisarnermut inatsit nutaaq peqqissaarullugu suliareqqissaarneqarnissaa ''tamannalu Inatsisartut ataatsimiititaliaanni pingaaruteqartutut isigalugu peqqissaartumik suliarineqarnissaa avaqquneqarsinnaanngitsoq'' oqaatigaa.
Sulisitsisunit maalaarnerit arlallit
Kattuffiit soqutigisaqartut aalisarnermut inatsimmnut nutaamut 2016-imi piareersarnermut peqataatinneqannginnerat, Sulisitsisut arlaleriarlutik maalaarutigisareerpaat.
Tamanna eqqarsaatigalugu Hans Aronsenip ''aalisarnermik inuussutissarsiuteqartut, aamma tunitsivinnik tunisassiorfinnillu ingerlataqartut, minnerunngitsumillu kattuffiit, suliniaqatigiiffiit, aalisarnikkullu susassaqartut tamaasa akuutillugit inuiaqatigiinni aalisarnermik inuussutissarsiuteqarnerup pitsaanerpaamik ataatsimoorfiusumillu angusaqarfiunissaa siunertaralugu suleqatigiittoqarnissaanik'' kajumissaaruteqarnera soqutiginarpoq.
Oqaloqatigiinneq
Aalisarnermut piniarnermut naalakkersuisup, Karl-Kristian Krusep, aalisarnermi susassaqartunik oqaloqateqarneq aallarteqqissaneraa nalunarpoq. Tusarniaaneq naammassereerpoq, inatsisissatullu siunnersuut novembarip aallartinnerani saqqummiunneqassaaq, ukiakkullu ataatsimiinnerup naggaserneqarnerani novembarip 16-anni siullermeerneqassaaq.
Naak Karl-Kristian Kruse naatsorsuinernut inatsimmut siunnersuummut tunngaviusunik saqqummiussaqaraluartoq, manna tikillugu ''siunnersuutip Inatsisartunut saqqummiunneqannginnerani naalakkersuinikkut aalajangiiniarnissami pisariaqartumik eqqissilluni sulinissaq pisariaqartinneqarneranut'' unnersuussiinnarpoq.
Atuaruk: Kruse ''eqqissisimatitsiniarluni'' paasissutissanik isertuussivoq