oqallinneq

IA: Pitsaassuseq aatsaat allanngortinneqanngippat nuussuisoqarsinnaavoq

Sara Olsvigip Ilinniarfeqarfiit sisamat Nuummiit nuunneqarnissaannut kingunerisinnaasaannik misissueqqissaarneq sukumiisumik misissorusuppaa.

Savimminilerinermik ilinniarfik nuunneqarusuttunut ilaavoq.

IA-p siulittaasuata Sara Olsvigip ilinniarfeqarfiit sisamat Nuummiit nuunneqarnissaat maannamut qularutigingallarpaa.

Suliarlu Naalakkersuisunit suli aalajagiiffigineqarsimanngitsoq taanna isumaqarpoq.

Ilinniartitaanermut Ilisimatusarnermullu Naalakkersuisoq Doris Jakobseni (S) aamma Akileraartarnermut Aningaasaqarnermullu Naalakkersuisoq Aqqaluaq B. Egedelu aalajangerneq pitinnagu kingunerisinnaasaanik misissueqqissaartoqassasoq marlunngormat marluullutik tusagassiuutuninut nalunaaruteqarput.

- Pitsaassusseq aatsaat allanngortinneqassanngippat, nuussuinissamut peqataasinnaavugut, Sara Olsvig (IA) Sermitsiaq.AG-mut oqarpoq.

Ammasumik isumaqatigiinngitsut

Kommuninut qineqqusaarnerup nalaani Sara Olsvigip (IA) Naalakkersuisut siulittaasuat, Kim Kielseni (S) ammasumik oqalliseqatigaa. Taannami isumaqarpoq nuussuinissaq aalajagiiffigineqareertoq, Sarallu kingunerisinnaasai misissorneqaqqaassasut aalajangiusimallugu.

Qularnaateqanngilarli Savimminilerinermik Ilinniarfik Sisimiunut, Niuernermik Ilinniarfik Qaqortumut, Isumaginninnermut Siunnersortitut Ilinniarfik Ilulissanut kiisalu Eqqumiitsuliornermik Ilinniarfik Aasiannut nuunneqarnissaat Naalakkersuisut siunertaralugu aalajangiutereersimammassuk. Aammalu aalajagiiffigineqartinnagu sukumiisumik misissueqqissaarfigineqarnissaa.

Misissueqqissaarnermi uku isiginiarneqassapput: Nuussuinermi aningaasartuutit, ilinniartussarsiornerit, ilinniartut ineqarfiinik pisariaqartitsinermut sunniutissat kiisalu sulianut tunngatillugu avatangiisit ilinniartitsisunillu atorfinitsitsiniarneq.

Sulianut tunngatillugu avatangiisit ernumassutigineqartut

Tamannalu Sara Olsvigip (IA) atuarluaqqissaarusuppaa ilinniarfeqarfiit sisamat nuunneqarnissannut Naalakkersuisunut akuersinnginnermini.

- Qanoq aalajangerumaarnerput, misissueqqissaarnerup takutikkumaarpaa. Sulianut tunngatillugu avatangiisit kalluarneqannginnissaat qulakkeertariaqarparput, taanna oqarpoq.

Isumaginninnermut Siunnersortitut Ilinniarfik assersuutigaa ullumikkut Ilisimatusarfimmut atavoq, taamaasillunilu ilinniagaq universitetimi ilinniagassaalluni. Taamaanginnassanngippallu ilinniakkamut sunniinerlussinnaanera taassuma ernummatigaa.

Powered by Labrador CMS