IA-p tusatsiakkat ilumuunnginnerarpai

Inuit Ataqatigiit qineqqusaarnerup ingerlanerani arlaleriarlutik aperineqartarsimapput erniat akileraarutitigut ilanngaatigineqarsinnaanerat atorunnaarsinniarneraat. Juliane Henningsenillu oqarnera naapertorlugu tunngavilersuutigineqartarsimavoq qinersiviup siuliani Inuit Ataqatigiit Demokraatillu ernianut ilanngaat 10 procentimik appartissimammassuk, tassa 100 procentimiit 90 procentimut ilanngaatigineqarsinnaasunngorlugu.

- Akileraartarneq atugarissaarnerlu pillugu ataatsimiititaliarsuup inassutigaa erniat ilanngaatigineqarsinnaanerat ukiut qulit ingerlaneranni atorunnaarsinneqassasoq. Inuit Ataqatigiit erseqqissumik oqaatigaat taamaliornissaq piareersimaffiginagu, Juliane Henningsen Inuit Ataqatigiit sinnerlugit allappoq, imalu nangilluni:

- Erniat ilanngaatigineqarsinnaanerisa 100 procentimiit 90 procentimut appartinnerani aamma nuna tamakkerlugu akileraarut procentimik ataatsimik appartinneqarpoq. Taamaattumik taamatut akileraarutinik appaanerup ilanngaasinnaanerullu appartinnissaanik aalajangiinerit kingunerat tassaavoq illuutillit amerlanerusunik aningaasaateqalernerat.

Atuaruk: IA-mi ilaasortaq: Nunatut pisariaqartipparput aningaasarsiornikkut allanngortiterinissaq

Neriorsuerusunngillalli
Kisianni Inuit Ataqatigiit isumaqarput politikkikkut neriorsuivallaarnissaq ulorianartuusoq.

- Akileraartarnikkut aaqqissuussaanerup allanngortariaqarnera assortorneqarsinnaanngilaq. Ullutsinnut naleqqutinngilaq aningaasarsiornikkullu ineriartortitsinissamut kaammat-tuutaanani.

- Inuit Ataqatigiit allannguerusullutik qineqqusaarput. Inuiaqatigiit aningaasarsiornikkut inuppalaassutsikkullu nukittorsarusuppagut. Nalunngilarput nunatsinni pisoorujussuarnik inuppassuaqanngitsoq. Aamma nalunngilarput illuutillit atoriaannanik aningaasarpassuaateqanngitsut. Tamakku soorunami equmaffigalugit aaqqissuusseqqinniarpugut, Juliane Henningsen Inuit Ataqatigiit sinnerlugit taama allappoq.