oqartussaaqataaneq
IA-p siulittaasua: Tunngaviusumik inatsisini nutaani innuttaasut taasitinneqartarnissaat ilaassaaq
Inatsisini tunngaviusuni ikinnerussuteqartut illersorneqarnissaat Kalaallit Nunaanni atuutinngilaq
– Isumaga malillugu Kalaallit Nunaata tunngaviusumik inatsisissaani, qanittukkut oqaluuserisassatsinni, ikinnerussuteqartut illersorneqarnissaat qulakkeerneqartariaqarpoq, taamaasilluni apeqqutit, assersuutigalugu nuna uranimik tunisassiortuussanersugut tunisassiortuussannginnersugulluunniit, innuttaasunut taasissutigitinneqarsinnaalluni.
Taamatut Sermitsiamut oqarpoq Inuit Ataqatigiit siulittaasuat Sara Olsvig, Inatsisartut upernaannut ataatsimiinnerannut oqaaseqaatitut, tassani amerlanerussuteqaqqalaartut innuttaasut taasitinneqarnissaat itigartimmassuk.
Ikinnerussuteqartut illersorneqassapput
Naalakkersuisut ukiakkut ataatsimiinnermi inatsisinut tunngaviusunut kommissioni pillugu nassuiaateqassapput ´taamaasilluni Kalaallit Nunaanni Namminersorlutik Oqartussat kingorna paasisat tunngavigalugit aalajangiisinnaallutik Kalaallit Nunaannut inatsisinut tunngaviusunut kommissionimik pilersitsisoqassanersoq´.
– Nunatsinnut inatsisini tunngaviusussani ikinnerussuteqartut illersorneqarnissaat qallunaat inatsisaanni tunngaviusunisut erseqqitsigisumik ilusilersorneqartariaqanngilaq, tassa tappavani Folketingimi ilaasortat pingajorarterutaasa piumasarisinnaammassuk apeqqut pineqartoq innuttaasunut taasissutigitinneqassasoq, uagulli periusissarsiussaagut Inatsisartuni ikinnerussuteqartut piviusumik illersorneqarnissaannut, Sara Olsvig oqarpoq.
Innuttaasunit piginnaatitsissut
– Tamassuma tungaanut qanoq iliussaagut?
– Nammineq tunngaviusunik inatsisitaarnissatta tungaanut innuttaasunik taasisitsinissamik aalajangiisarsinnaavugut, Inuit Ataqatigiillu Inatsisartunut ilaasortat 31-it tamaasa suli kajumissaarpaat innuttaasut ilarpassui, taasisitsisoqarnissaanik kissaateqartut, tusaaniaqqullugit. Inatsisartuni akisussaaffigisigu misissussallugu apeqqummi matumani innuttaasut qanoq piginnaatitsinersut, Sara Olsvig oqarpoq.
Oqaluttuaq tamaat Sermitsiami sapaatip akunnerani saqqummersumi atuaruk. Aviisi pisiarisinnaavat uani: