Aleqap atornerluinera
IA-p siulittaasua Sara Olsvig qinerseqqusivoq
Partii angisooq illua'tungiluttoq oqarpoq Naalakkersuiut siulittaasuata landskarsip aningaataasaataanik atornerluinera akuerineqarsinnaanngilluinnartoq
– Maanna piffissanngortoq innuttaasut aperissallugit maanna aqutsineq akuersaarsinnaaneraat. Qinersisariaqarpugut. Taamatut tusagassiorfinnut nalunaarutikkut allappoq Inuit Ataqatigiit siulittaasuat Sara Olsvig, Aleqa Hammondip Kukkunersiuinermut Ataatsimiititaliallu akornanni allaqatigiittarsimanerisa tamanut saqqummiunneqarnerannut qisuariaatitut.
Inuit Ataqatigiit ernumaammiutigisaminnik Inatsisartut Kukkunersiuisuisa ilisimatitsissutaat tusagassiuutinullu nalunaarutaat Nunatta Karsiata aningaasaataanik atornerluisimanermut tunngasoq tiguaat, Sara Olsvig tusagassiorfinnut nalunaarutikkut allappoq:
`Naalakkersuisut siulittaasuata inuiaqatigiit aningaasaataannik ingerlatsinermini pissaanermik atornerluineq takutitaa Inuit Ataqatigiit akuerisinnaanngilluinnarpaat. Annermik maluginiarparput pineqartut tassaammata pissutsit ukiuni arlalinni ingerlasimasut, ataasiaannarnerunngitsullu.´
–. Nunatta Karsia – kinaluunniit sunaluunnillu pineqaraluarpata – atorneqassanngilaq nammineq angalanernut, nammineq katerisimaartitsinernut, nammineq minibarinik atuinernut il.il. Tamanna akuerineqarsinnaanngilaq, Sara Olsvig erseqqissaavoq, tikkuarlugulu landskarsip aningaasaatai illersorneqarsinnaasumik ingerlanneqassasut.
– Naalakkersuisut pisussaaffigalugulu akisussaaffigaat, aqutsinerup inatsisit malittarisassallu atuuttut naapertorlugit ingerlanneqarnissaa.
Nunap aqunneqarneranut akisussaasutut inissisimaneq, suli annermik inatsisinik malittarisassanillu maleruaanissamik piumasaqaatitaqarfiuvoq, taamatullu Inatsisartunik Namminersorlutillu Oqartussat ingerlatsiviinik qanimut tamanullu ersittumik pissuseqarnissaq piumasaqaataalluni.
– Takusinnaavarput Naalakkersuisut siulittaasuata tamanna piviusunngortissinnaanngikkaa, tamannalu Nunatta iluaqutigisinnaanngilluinnarpaa. Nunatta aqutsisuisa ataatsimoorluta aningaasaatitsinnik inatsisinik unioqqutitsillutik ingerlatsinerat tusagassiuutini qulequtarineqaraangat Nunarput annertuumik innarlerneqartarpoq.
– Aammattaaq maluginiarparput, Naalakkersuisut Siulittaasuata Inatsisartuni kukkunersiuinermut ataatsimiititaliaata suliai soqutaanngitsutut saqqummersimmagit. Suliap ilungersunartuunera naqissusertariaqarparput; Kukkunersiuinermut ataatsimiititaliaq isumaqatigiittoq aalajangermat suliaq malersussallugu avammullu saqqummiutissallugu, Sara Olsvig oqarpoq piumasaralugulu nunap aqutsisui ersarissumik uppernartumillu pissusilersortassasut.
– Maanna saqqummersoq tunuliaqutaralugu Naalakkersuisuusut takutippaat tamanna piviusunngortissinnaangilluinnarlugu, taanna tikkuaavoq.
– Inatsisartuni ilaasortaasugut sulerusukkaluarpugut. Nunarput aningaasaqarnikkut ajornartorsiorpoq. Sulinissatsinnut piareersimalluta, suleqatitta oqalliseqatiginissaat kiisalu nunatta ilorraap tungaanut aallartinnissaanut suleqatigiinnissamut qilanaarsimagaluarpugut. Akuerisinnaanngilarpulli, suliat nunatta aningaasaqarneranut tusaamaneqaataanullu innarliisut saqqummeqattaaginnarmata, IA-p siulittaasua oqarpoq.