maajip aallaqqaataa
IA-p siulittaasua: Assigiinngissuseqarneq kikkut tamarmik akiussavaat
Assigiinngissuseqarnerup akiorniarnerani sulisartut kattuffii pingaaruteqartorujussuupput, IA-p siulittaasua Sara Olsvig isumaqarpoq
Inuit Ataqatigiit siulittaasuat Sara Olsvig ullumi nunani tamalaani sulisartut ulluat malunnartinniarlugu oqalugiartut ilagaat.
Oqalugiarnermini erseqqissarpaa inuiaqatigiinni assigiinngissuseqarneq annertusiartortoq, tamannalu kikkunnit tamanit akiorneqartariaqartoq.
– Assigiinngissuseqarnerup akiorniarnerani sulisartut kattuffii pingaaruteqartorujussuupput. Tassami inuiaqatigiinni akissarsiatigut sulinermilu atugassarisatigut assigiinngissuseqarneq suli annertuvallaaqaaq. Sulisartut kattuffii nukittuujussapput pissutsinut tamakkununnga sunniuteqarsinnaasut, taanna oqalugiarnermini oqarpoq.
Inuusuttut peqataassapput
Taanna isumaqarpoq sulisartut kattuffiini nutarterineq inuusuttunillu peqataatitsineq qulakkeerneqassasoq.
– Kattuffiit annertuumik akisussaaffeqarput inuiaqatigiittut sulisartut atugassarisaannik samminninnerunissatsinnut ilisimasaqarnerunissatsinnullu, aamma peqataanissamut periarfissiinissamut, Sara Olsvig oqarpoq.
Tunngaviusumik naleqartitat
Inuit Ataqatigiit oqaluuseritikkusuppaat nunami maani tunngaviusumik naleqartitavut suunersut.
– Naleqartitat sulisartoqarnermi tunngaviusut takuvagut, nammaqatigiinneq, ataatsimuussuseq kattussinnaanerlu, inuiaqatigiinni naleqartitatut pingaarutilittut qitiusutullu. Inuit Ataqatigiit isumaqarput tunngaviusumik naleqartitavut politikkikkut itinerusumik oqallisigissagivut.
– Pingaartipparput tusassallugu Naalakkersuisut nunamik aqutsinerminni naleqartitat suut tunngavigineraat. Qanoq isumaqarpa ´ataatsimoorluni kivitsineq´. Inuiaqatigiinni assigiinngissuseqarneq annertusigaluttuinnartoq politikkikkut akiorniassagutsigu ilisimassavarput sulinermi tamatumnani tunngaviusumik naleqartitat suut tunngaviginerlutigit. Inuit Ataqatigiinni isumaqarpugut piffissanngortoq nunatta siuariartornerani naleqartitatta itinerusumik oqaluuserinissaannut, Sara Olsvig oqarpoq.