qinersineq
IA-p qineqqusaartitaa: Attartortut isumagineqarnerusariaqarput
Inuit Ataqatigiit Inatsisartunut qineqqusaartitaat, Bendt B. Kristiansen, isumaqarpoq piffissanngortoq inissiaatillit aserfallatsaaliinissaminnut pisussaaffeqarnerulernissaat siunertaralugu attartornermut nutaamik inatsiliortoqarnissaanut
Pisortat, Namminersorlutik Oqartussat aamma kommuunit, inissiaatiminnik aserfallatsaalinissaminnut pisussaaffimminnik kinguarsaapput, naak attartortut ineqarnermut akiliutimikkut aserfallatsaaliinermut akiliuteqartaraluartut.
Taama isumaqarpoq Bendt B. Kristiansen Inuit Ataqatigiit sinnerlugit Inatsisartunut qinigassanngortittoq. Taassuma maanna piffissanngorsoraa nutaamik attartornermut inatsisiliortoqarnissaanut attartortunut isumaginninnerusumik.
- Attartortuunerup aningaasatingut oqimaallingaluttuinnarnera attartortunut naapertuukkunnaaraluttuinnarpoq. Attartortut inatsit malillungu aserfallattaaliinissanut annerusumik minnerusumilluunniit akisussaasuunerat naapertuutinngilaq, pingaartumik piginnittut, kommunit imaluunniit Namminersorlutik Oqartussat, aserfallattaaliinissamut
aningaasaleeqataasinnaanerannut pisussaaffeqarnerat taamak annikitsigitillungu, Bendt B. Kristiansen oqarpoq.
Inatsisip aserfallatsaaliinerit qulakkiissavai
Taamaammat Bendt B. Kristiansen isumaqarpoq maanna piffissanngortoq attartornermut inatsisip, attartortunut iluaqutaanerusunngortinnissaa siunertaralugu, nalilersuiffigeqqinnisaa.
- Attartortut akiliutaannit inissianik piginnittoq ukiumut 1,5 procentimik pissarsiaqartarpoq. Soorlu Qaasuitsup Kommunia ukiumut 12 million koruunit missaanik pissarsisartoq. Aningaasat kommuunit inissianut aserfallassimasunut pinnagit kommunip karsianut nakkartittagaat. Tamanna inissiarpassuit aserfallassimassusaat eqqarsaatigalugu naapertuukkunnaavippoq, Bendt B. Kristiansen oqarpoq.
Taamaammat Bendt B. Kristiansen isumaqarpoq inissianik piginnittut aserfallatsaaliinermut pisussaaffii annertunerusariaqalersut.
- Attartortutut atugarisaat oqinnerulissappata inissianik piginnittut inissianut attartortakkanut akisussaaffeqarnerat ullumernit annertunerusariaqarpoq, Bendt B. Kristiansen oqarpoq.