IA-p nunanut allanut ministeri narrutsassimaarutigaa

Danmarkip nunanut allanut ministeriata, Radikale Venstreneersup Martin Lidegaardi, Nunanut Allanut Ministeeriaqarfimmut Pituffik pillugu ataatsimiigiaqqusissutit ataasinngornermi nassiussuuppai. Ullumi marlungornermut ataatsimiigiaqqusisoqarpoq, Kalaallit Nunaat pillugu Ataatsimiititaliami oqaaseqartartunut nassiussuunneqartumik. Folketingimili kalaallit oqaaseqartartui aggersarneqarsimanngillat.

- Nunanut allanut ministerip Pituffik pillugu ataatsimiigiaqqusinermini, Kalaallit Nunaanniit Folketingimut ilaasortasugut piaaraluni peqataatinngimmatigut assut narrutsassimaarutigivara, Inuit Ataqatigiit Folketingimi ilaasortaatitaat Johan Lund Olsen oqarpoq.

Imalu nangippoq:

- Ilumoorsinnaanngivippoq, Pituffik – Kalaallit Nunaannut taama pingaaruteqarluinnartigisoq – pillugu suliassaq oqallisigineqassappat, kalaallit qinikkat piaaraluni peqataatinnagit. Tassami maani danskit parlamentianni suliassatta ilarpiaat tassaavoq: Kalaallit Nunaannut tunngassuteqartut suulluunniit pisariaqartumik maluginiarneqarnissaasa qularnaarnissaat, pisariaqarfiatigullu pissutsit aaqqiivigineqarnissaasa periarfissarsiuunnissaat. Ullumikkut ataatsimiinnermi ingerlanneqartumi taamaaliorsinnaasimanngilanga. Allaammi oqaaseqartartuunerma saniatigut Kalaallit Nunaat pillugu Ataatsimiititaliami siulittaasuugaluarpunga.

Atuaruk: Pituffimmi isumaqatigiissutip Folketingimi matoqqasumik isumasioqatigiinnissap ima pissuteqarpoq

Inuit Ataqatigiit isumasioqatigiinnissaq piumasareqqippaat
Taannalu Inuit Ataqatigiinnit tapersersorneqarpoq:

- Folketingimi ilaasortarput Johan Lund Olsen isumaqatigilluinnarpara oqarmat nunamut allanut ministerip nunatsinniit Folketingimut ilaasortat suliami uani ilaatinngimmagit akuersaarneqarsinnaanngitsoq. Piffissami matumanerpiaq USA-mik isumaqatigiinniarnerit ingerlanneqarput, tamakkiisumillu pisunik ilisimatinneqartariaqarpugut, aamma uagut nammineq Naalakkersuisutsinniit.

Taama Inuit Ataqatigiit siulittaasuat, Sara Olsvig, allappoq. Taassuma ilanngullugu aamma ilisimatitsissutigaa partiip Naalakkersuisunik Pituffimmut suliaq pillugu isumasiueqqinnissaq piumasareqqissimagaa.

- Nunatsinni qinikkat aammalu nunatsinni innuttaasugut paasitinneqarusunnginnerput assut tupaallaatigaara. Qanoq ilillutik nunatsinni Danmarkimilu naalakkersuisut taamatut periuseqarneq akuerisinnaavaat? Akuersaarneqarsinnaanngilaq, Sara Olsvig allappoq.

Pituffik pillugu allaaserisat allat uani atuakkit