IA-p Naimángitsoq eqqaaniarpaa

– Piniartoq, ikinnguterput suleqaterpullu Naimángitsoq Petersen akornatsinniikkunnaarpoq.
Inuit Ataqatigiit siulittaasuata Kuupik Kleistip Naimángitsoq Petersenimut, sapaatip akunnerani kingullermi sisamanngormat 56-inik ukioqarluni tassanngaannarluni toqusumut, eqqaaniunni taamatut aallartippaa.
Kuupik Kleistip eqqaniutaa aaqqissuisoqarfiup ilannguppaa:
"Sisamanngorneq 18. juli 2013 tupannaqisumik ikinngutitta suleqatittalu Naimángitsup tassanngaannarluni toqukkut qimagunneranik Inuit Ataqatigiinni aliatsaatigeqisatsinnik kalerrinneqarpugut.

Naimángitsoq Petersen inuk qaqutigoortuuvoq, piniartoq politikereq inoqatiminut sutigut tamatigut ikiuukkumatoorsuartut Inuit Ataqatigiinni ilisarisimalersimasarput.
Atuaruk "Naimángitsoq toquvoq"
Naimángitsup politikkikkut isumatuumik isummertarnera suleqatigiinnitsinnut nukittorsaa-taasarsimavoq, minnerunngitsumik piniartut atugarisaat sammileraangatsigit. Inuit Ataqatigiit Siulersuisuunerini Inatsisartunilu aammalu kommunimi ukiorpaalunngulersuni suleqatigisimaneranut qujassutissagut amerlapput. Inoqatitsinnik tatiginartumik, unneqqarissumik Inughuillu nipaanik ersarissumik oqariartuuteqartuartumik inummillu siunnersuisinnaasumik annaasaqarpugut.

Naimángitsup ilisarnaatai qaqugorsuarmullu eqqaamaneqaatissai tassaapput inuiaqatigiinni minnerutitaasunut naapertuilluartumik iluarseerususseqartuartuunini, pissutsinut equngaso-risaminut akiuuttoq eqqortorlu anguniarlugu ilungersuuteqartuartoq. Naimángitsoq inuk saamalluinnartuuvoq inoqatiminut asannittoq piniariareersimatillunilu pisaminik najukkamini pisariaqartitsisunut utoqqarnullu pajuttortitsiuartoq.
Naimángitsoq piniartoqatiminut piniartunngorniartunullu qiimmassaajuarluni kaammat-tuisuusimavoq nunaqqatiminut avanersuarmiunut politikkikkut annikinngitsumik sunniute-qarluartoq. Naimángitsoq ukiuni kingulliunerusuni annertuumik sukkornermik nappaate-qaraluarluni nikallujaalluni toqussi tikillugu najukkamini aamma peqatigiiffilerisuuvoq nunaqqataasunit tamatsinniillu qujamasuutigisatsinnik.Naimángitsup nuliani Birthe meeqqanilu tallimat erngutannguanilu tallimat tamaasa asangaakkani qimatarai, matumuunalu annertuumik annaasaqarnissinni misiginneqataa-nerput apuukkusupparput.

Naimángitsoq Petersen-ip eqqaaneqarnera ataqqinartuuli.

Inuit Ataqatigiit sinnerlugit
Kuupik Kleist
Siulittaasoq