IA-p naalakkersuisoqatigiinnissaq itigartitsissutigaa
Partii naalakkersuisoqatigiinnut isamittunut annaasiniartuunissartik kissaatiginagu, IA oqariartuuteqarpoq. Allatut naalakkersuisoqateqarnissamut periarfissaq misissorniaraat.
IA-mi siulittaasoq Sara Olsvig (IA) Siumumik naalakkersuisoqateqarnianngilaq. Taanna tusagassiuutinut nalunaarummi taama allappoq.
- Siumup siuttui massakkut aappassaat isumaqatigiinninniarfigisimalerpagut. Ersarissumillu inerniliussarput tassaavoq naalaarusussuseqarnermik, akuutitsinerusussuseqarnermik, isertuanngitsumik ammasumillu pissuseqarluni aqutsilluarnissamik sulissuteqarusussuseqartoqanngitsoq, tusagssiuutinut nalunaarummi tamanna allaqqavoq.
- Taamammat unneqqarissuseqarluta nalunaarutigaarput Inuit Ataqatigiit Naalakkersuisooqatigiinni isasoorsimasunik annaassiniartussaannartut inissisimanissarput kissaatiginnginnatsigu. Pisut takutippaat maanna siuttuusut naalakkersuinikkut katersuutsitsisoqarsinnaasimanngitsut.
Kim Kielsenip amerlanerussuteqarluni naalakkersuisuutitsiniaruni maanna Demokraatinik periarfissatuanut naalakkersuisoqateqarnissamut innersuunneqarneranik, IA-p nalunaaruteqarnera isumaqarpoq.
Demokraatit pingasunngorpat isumaqatiginiarneqarnissaat isumaqatigiissutigineqarnikuuvoq.
Kim Kielsenip aamma ikinnerussuteqarluni naalakkersuinissani misilissinnaavaa, tamannali aarlerinaateqarpoq.
IA-p Siumimik suleqateqarnissaminut taarsiullugu maanna Kim Kielsen avaqqullugu naalakkersuisoqatigiiliorniarsariniarpoq.
- Isumaqarpugut allaanerusumik pitsaanerusumillu periarfissaqartoqartoq, partiillu allat soqutigissappassuk tamanna pillugu oqaloqatigiinnissamut piareersimavugut. Illuatungiliuttutulli nukittuumik katersuuffiusumillu sulinissarput aamma piareersimaffigilluinnarparput, tusagassiuutinut nalunaarummi tamanna oqaatigineqarpoq.
- Pingaarnertut inuiaqatigiit innuttaasullu patajaatsumik ammasumillu naalakkersuinermik ingerlatsisoqarnissaa pisariaqartippaat. Tamanna ullumikkut naammassineqanngilaq takujuminaatsipparpullu siuttut taakkuutillugit naammassineqarnissaa, Sara Olsvig nangilluni allappoq.