IA-p Naalakkersuisooqatigiit oqaasii kusanartut aningaasaqarnermut inatsisissami maqaasivaat

Inuit Ataqatigiit gruppiminni siulittaasuat, Agathe Fontain, tamanut ammasumik allagaqarluni Naalakkersuisooqatigiinnut arlalitsigut uparuaavoq. Taassumami qatsulluinnarpaa Pituffimmi kiffartuussinissamut suliariumannittussarsiorluni suliaq, aningaasaqarnermut inatsisissatut siunnersuut nutaaq kiisalu ‘Future Greenland’-imi isumasioqatigiinnissaq.

Nunatsinni allaffissornikkut sulinermi suli toqqissisimanngitsumik ingerlatsisoqarpoq, Fontain isumaqarpoq:

- Kingullertigut sapaatip akunnerani uani ukiormanna ‘Aningaasaqarnikkut ingerlatsineq pillugu Nalunaarusiaq’ Inatsisartuni oqaluuserineqarmat Siumup oqaaseqartitaanit atorfilittat pissaaneqarnerluttutut oqaatigineqarput. ‘Naalakkersuisooqatigiit atorfilittanit akerlilersorneqartut’ oqaatigineqarpoq.

- Taamaattumik naalakkersuisooqatigiit aqutsinerminnut tunngatillugu imminnut isornartorsiorlutik qiviartariaqarput, Agathe Fontain oqarpoq innersuussutigalugulu Naalakkersuisunik nikisiterisimaneq kiisalu Naalakkersuisoqarfimmi pisortanik marlunnik soraarsitsisimaneq 3,6 millioner koruunik naleqartoq, kiisalu Naalakkersuisooqatigiinnit suli nassuiaasersorneqarsimanngitsoq.

Pituffimmi suliariumannittussarsiornermut uparuaavoq
Inuit Ataqatigiit gruppiminni siulittaasuata aamma Pituffimmi kiffartuussinissamut suliariumannittussarsiorsimanermut suliap qanoq iliuuseqarfigineqarnissaa ujartorpaa.

- Pituffimmut kapitalimut tunngasoq suli naammassineqanngilaq. Imaassinnaavorlumi naammassineqanngisaannassasoq. Naalakkersuisummi pisamut advokatimit misissuisitsipput, taannalu naammassippat takuneqaqqusaassanngilaq. Immaqa aatsaat inuit suliakkiisimasut – pisamilu tamarmik pingaarnertut inuttaasut pinngitsuutinneqarpata, Naalakkersuisut siulittaasorisimasaat Aleqa Hammond ilanngullugu, politikeri oqarpoq, Naalakkersuisut ‘Future Greenland’-imik taasami maajimi isumasioqatigiisitsinissamut periusaannut uparuaannginnermini.

Isumaqatigiinnerit nuannarineruaat
- Allaanngilaq Naalakkersuisut iluarisaminnik oqaaseqartartut kisiisa suleqatigerusukkaat. Taamaattumik ataatsimeersuarnermi oqalugiartussat ilaannik naammaginninnginneq pillugu Naalakkersuisut siulittaasuat peqataajumanani nalunaarpoq.Tamannali sioqqullugu soqutigisaqaqatigiinnut pilersaarutinik allannguinissaq, taamatullu oqalugiartussap peerneqarnissaa, kimigiiserfigineqarpoq

Agathe Fontain isumaqarpoq kattuffiit ingerlavissaannik saqititsiniaanertut pissuseqarneq ulorianaateqartoq attaviitsuunerlu apeqquserneqarsinnaasunngortinneqarluni.