Politikki
IA-p inuusuttai: Naalakkersuisut pilersaarutiminnut qanoq aningaasaliiniarpat?
Ineqarnermut Sanaartornermut Angallannermullu Naalakkersusioq, Atassummit Knud Kristiansen umiarsualiviit aaqqissuuteqqikkusullugillu nutarterusuppai. Pilersaarutit qanoq aningaasalerneqassanersut Inuusuttut Ataqatigiinnit paaserusunneqarpoq
Inuit Ataqatigiit inuusuttortaasat Inuusuttut Ataqatigiit Naalakkersuisunut isornartorsiueqqipput.
Naalakkersuisooqataasut Atassut aamma Demokraatit Siumumit nipangeqqusaasimanerarlugit isornartorsiorlugit aperaat.
Inuusuttut Ataqatigiit angallannermut naalakkersuisoq, Atassutip siulittaasua Knud Kristiansen, isornartorsiorpaat. Naalakkersuisup Qanoruukkut pingasunngormat oqaatigaa umiarsualiviit 95-it nutarterneqarnissaat Naalakkersuisunit pilersaarutigineqartoq.
Umiarsualiviit nutarsarneqarnissaannut qanoq aningaasaliisoqassanersoq Inuusuttut Ataqatigiinnit paaserusunneqarpoq.
- Tupaallaatiginngilarani siunertaminut annertuunut piviusunngortitsinissaminut aningaasartuutissani saqqummiutimmagit, ulloq mannami tikillugu Naalakkersuisut pilersaarutiminnut annertuunut politikkiat tassaammat pilersaarutit aningaasatigut kingunissai pillugit qanorlu pilersaarutit aningaasalersorneqarnissaat pillugit saqqummiussaqartannginneq, Inuusuttut Ataqatigiinni siulittaasup tullia Jane Petersen tusagassiutinut nalunaarummi allappoq.
IA-p inuusuttai: Takorluuisussatut naalakkersuisuusoq
Taamaattumik Inuusuttut Ataqatigiit isumaqarput Naalakkersuisut pilersaarutit aningaasartuuteqarfiusussat pillugit ersarinnerusumik saqqummiussisalertariaqartut.
- Inuusuttut Ataqatigiit isumaqarput nunamik aqutsissagaanni sinnattorsinnaaneq kisimi naammanngitsoq. Qanorooq-mi aallakaatinneqartumi Naalakkersuisup qulaani pisamama oqaatigisai malillugit paasineqarsinnaavoq sinnattortussatut naalakkersuisunngortinneqarsimasoq, tassami ataasinnguamilluunniit pilersaarutimi qanoq aningaasalersorneqarnissaannut tikkuussinngimmat, Jane Petersen oqarpoq.