Tunngaviusumik inatsisissaq pillugu isumalioqatigiissitaq
IA-p Dobora Kleist Tunngaviusumik inatsisissaq pillugu isumalioqatigiissitamut toqqarpaa
Inuit Ataqatigiit Inatsisartuni gruppiata Debora Kleist Tunngavisumik inatsisissaq pillugu isumalioqatigiissitamut ilaasortatut toqqarpaa. Taassuma, Ane Hansen (IA) Kommune Qeqertalimmi borgmesterinngortussaanini pissutigalug Inatsisartuni sulinngiffeqartoq, paarlappaa.
Inuit Ataqatigiit Inatsisartuni gruppia, Tunngaviusumik inatsisissaq pillugu isumalioqatigiissitami ilaasortamik toqqaanissaq pillugu arfinininngornermi ulloqeqqata tungaani ataatsimiipput. Inatsisartut gruppiata Debora Kleist toqqarpaa.
- Debora Kleist politikkikkut misilittagaqarluarnermigut ataatsimoortitsillaqqissuunermigullu Tunngaviusumik inatsisissaq pillugu Isumalioqatigiissitami ilaasortaatitatta aappaa Mimi Karlsen peqatigalugu nukittorsaqqinnissaanut piginnaasaqarluarpoq, IA-p siulittaasua, Sara Olsvig, tusagassiuutinut nalunaarummi allappoq.
Aamma atuaruk: Isumalioqatigiissitaq suli akerleeriiffiusoq
Aqutsinermik pitsaanerusumik piumasaqartoq
Inuit Ataqatigiit Isumalioqatigiissitap sulinerata aallartisarnerani suliaq politikkikkut pinnaassutaasimanera uggornartutut isigaat.
- Isumalioqatigiissitami suliap imarisaa ullormit siullermit samminagu piffissarujussuaq nukipparujussuillu kikkut ilaasortaanissaannut isummersoqattaarnermut atorneqarput. Tunngaviusumik inatsisissaq pillugu Isumalioqatigiisitap siulersorneqarnerani aqutsilluarnerusoqarnissaanik piumasaqarpugut, suliallu torersumik ataatsimoorfiusumillu ingerlanneqarnissaanik sakkortuumik kaammattuivugut, IA-mit oqaatigineqarpoq.
Ikinnerussuteqarluni taasineq
Partii Isumalioqatigiisitamut ilaasortaatitami aappaata ilaasortaaginnarnissaanut qinnuteqaatip itigartinneqarnerani Naalakkersuisuni ikinnerussuteqarlutik amerlanerussuteqartunit allaanerusumik isummersimanertik, IA-p siulittaasuata ilanngullugu oqaatigaa.
- Neriuutigaarput ilaasortaatitatsinnik maanna taarsiisariaqarnermik aalajangerneq siunissami Isumalioqatigiisitamut ilaasortanik taarsiisaqattaartalernissamik kinguneqassanngitsoq, Sara Olsvig allappoq.
Pisut aalajangiiffigineqartariaqalersimasut kingulliit eqqarsaatigilluagaanerusumik inuttaleeriaaseqartariaqarnermik pisariaqartitsisoqarnera takutinneqartoq, taanna erseqqissaavoq.
IA-p naleqatitai tunngaviusumik inatsisissamut
IA Tunngaviusumik inatsisissaq pillugu isumalioqatigiissitami suliaqarnermi tunngavilersuutigineqarsinnaasut arlallit erseqqissarpai.
- Tamanik inissaqartitsineq Inuit Ataqatigiit tunngaviusumik inatsisissatsinni malitassatut tunngaviusutut pingaartitaraarput. Tunngaviusumimmi inatsit inuit innuttaasutut politikkikkullu pisinnaatitaaffiinik imaqartussaavoq.
- Kia sumik pisinnaatitaaffeqarneranik apeqqusiisoqassappat aalajangiusimaffigaarput kinaluunniit imminut kalaalertut isigisoq akuersaarneqassammat. Aamma uatsinnut tunngaviulluinnarpoq nunatut nunatsinni ikinnerussuteqartunut pisussaaffitsinnik naammassinnittassagatta. Allatut oqaatigalugu peqataatitsissaagut, immikkoortitsinata. Tamanna kinaassutsimut, oqaatsinut, qanoq isikkoqarnermut inuiaassusermullu atuutissaaq. Tamattami atorfissaqartinneqarpugut, partiimit oqaatigineqarpoq.
Siammasissumik peqataatitaqarneq
Tunngaviusumik inatsisiliornissamut suliap siammasissumik peqataaffigineqartumik, inuiaqatigiinni kattuffiit, kommunit, sussaqartut minnerunngitsumillu innuttaasut peqataatinneqarnerungaarlutik ingerlanneqartariaqarnerata pingaaruteqassusaa, IA-p ilanngullugu erseqqissaatigaa.
Aamma atuakkit:
Isumalioqatigiissitaq suleqqinnissamut piareertoq
Sukap isumalioqatigiissitami akerleriinneq aaqqiissuteqarfigaa
IA-p tunngaviusumik inatsisissaq pillugu isumalioqatigiissitami ilaasortaatitassaminik toqqaavoq