IA-p borgmesteritut piukkussai qinersisoqarluartariaqartut

Inuit Ataqatigiit kommunini tallimaasuni borgmesterinngortitserusupput.

Stine Egede Koummune Kujallermi borgmesteritut piukkunnaateqarnerarlugu partii nalunaaruteqaqqammerpoq. Taamatullu Qaasuitsup Kommuniani avannarlermi Bendt B. Kristiansen borgmesterissatut tulluartinnerarlugu.

Taakkuli marluk borgmesterinngussappata qinerneqarluaqqaartariaqarput.

Kujataani Siumut amerlanerussuteqarpoq

Kommune Kujallermi Siumumit bormesteri Jørgen Wæver Johanseni inissisimalluarpoq. Inuit Ataqatigiilli qineqqusaartitartik pitsaanerusoq isumaqarput.

- Unneqqarissumik, imminut sullissisuunngitsumik, unioqqutitsinngitsumik, allamik saniatigut suliaqanngitsumik inuillu qitiutilluinnarlugit sulisussamik borgmestereqartariaqarpugut, Kommuni Kujallermi IA-p immikkoortortaqarfia tusagassiuutinut nalunaarummi allappoq.

Atuaruk: Partiit pingasuinnaat kommunini tamani qinigassanngortitsipput

Tamanna piviusunngussappat Inuit Ataqatigiit ukiut sisamat matuma siorna qinersinermit siuariaateqangaatsiartariaqarput Siumumullu qinersisut ikinnerujussuusariaqarlutik.

Inuit Ataqatigiimmi 29,6 procentinik qinersinermi kingullermi taaguunneqartut Siumut 52,4 procentinik taaguunneqarluni ajugaammat.

Taamaammat Inuit Ataqatigiit Atassummit, kingullermi 11 procentinit taaneqartut, taperserneqaraluaramilluunniit qinersisartut amerlanerit suli pisariaqartippaat. Demokraatit Partii Nalerarlu kujataani sassartitaqanngillat.

IA Siumukkormiut akornanni

Stine Egede tupaallatsitsissappat avannaarmiut Bendt B. Kristiansenertaannut sanillersuunneqarsinnaassagunanngilaq.
Men hvis Stine Egede skal overraske, så er det ingenting i sammenligning med, hvad Bendt B. Kristiansen skal.

- Ukiuni kingullerni Siumut borgmester-iutitaqarnerani innuttaasut kommunip aqunneqarnera annertuumik naammangittaalliutigiuarpaat, suli maannamut allaat, Qaasuitsup Kommuniani avannarlermi Inuit Ataqatigiit tusagassiuutinut nalunaarummi allapput, Qaasuitsup Kommuniani avannarlermi Inuit Ataqatigiit immikkoortortaqarfiat tusagassiuutinut nalunaarummi allappoq.

Taama oqariartuuteqarnerup Siumumit borgmesterinngortoqaqqinnissaralua pinngitsoortinneqarsinnaanersoq marlunngorpat qinersisoqareerpat paasinarsissaaq. Siumummi qinersinermi kingullermi Qaasuitsup Kommunia avannarlinngorumaartussami qinersisartut 61,8 procentiisa taaguussimavaat.

Atuaruk: IA: Marlunnik qinigaaffeqartarnermut oqariartuutertup Martha Lund Olsenimut tunngassuteqanngilaq

Inuit Ataqatigiit taamani 14,8 procentiinnarmik taaneqarput. Borgmesterinngortitsissagunillu tupinnartuliamik qinersisartut amerleriaateqartariaqarlutik.

IA Atassummit amerlanerussuteqaqqatuppoq, taakkumi 13,8 procentiinnarmik taaneqarmata. Partii Naleraq pernaammik kommunimut qineqqusaartitsimmat Siumumit qinersisartut ilaannit taaguunneqassajunnarsivoq. Demokraatit kingullermik taanikinnerpaallutik qinersisartut 3,3 procentiinnaannit taaneqarput, siuarialaarsimanissaallu ilimanarlutik.

Partiilli taakku pingasut qinerneqarnerussagaluarpata ataatsimuulerlutillu, Siumukkut qinersisartut 12 procentiisa aatsaat qininngippassut Bendt B. Kristiansen Qaasuitsup Kommuniani avannarlermi borgmesteritut taasinnaanngussaaq.