IA-p aningaasanut inatsit akuerinissaanut marlunnik piumasaqaateqarput

Naalakkersuisooqatigiit Siumumit siuttuuffigineqartut illuatungiliuttut Inuit Ataqatigiit aningaasanut inatsimmut akuersinissaat qulakkiissagunikku, naalakkersuisooqatigiit immikkoortunut marlunnut akuersisariaqassapput. Partiip aningaasaqarnermut oqaaseqartartua Naaja Nathanielsen taama naqissusiivoq.

Atuaruk: Sulisitsisut: Aningaasanik aqutsineq ernumanartoq

Suliat qummut killilerneqarnissaat
Ilaatigut aningaasaqarnermut inatsimmi 2016-imi isumaginninnermik ingerlatsisut suliassaasa qassiuneri qummut killilerneqarnissaat ersarissumik allanneqassaaq.

- Isumaginninnermut ingerlatsivinni siunissaq eqqarsaatigalugu tassaasut inuiaqatigiit nukittunerusut anguneqarsinnaanerannut matuersammik tigumminnittut oqilisaanneqarnissaat pingaaruteqartutut isigaarput. Siunertamut tassunga sillimmatissanik immikkoortitsisoqareersimammat siunnersuut 2016-imi malunnaatilimmik aningaasartuutaasussaangilaq, oqaaseqartartoq oqarpoq.

Inuusuttunik sullissineq nukittorsarli
Aammalu efterskolinut, højskolinut kiisalu ingerlatseqatigiiffinnut inuiannut akisussaaffilinnut inuusuttunik sullissisisunut amerlanerusunik aningaasaliinissaq piumasarineqarpoq.

- Piareersarfiit annertuumik suliniuteqarput, kisimiillutilli suliassat naammassisinnaanngilaat. Isumaqarpugut inuunermut ilinniagarnissamullu amerlanerusut inuusuttortatsinnut tunniussassaqartut, Naaja Nathanielsen erseqqissaavoq.

Aningaasanik amerlanernik pisariaqartitsisut
Taassuma tikkuartorpaa, ilaatigut siunertanut taakkununnga atorsinnaasunik Naalakkersuisut 3 miollionit koruuninik nassaarsimasut.

- Aningaasaliiffissat minnerpaamik arfiniliunerat arfineq marluuneralluunnit eqqarsaatigalugu Inuit Ataqatigiinnili isumaqarpugut aningaasat taakku ikippallaartut. Taamaammat immikkut 5 millionit koruuninik ilaneqarnissaat siunnersuutigaarput, taamaalilluta siunertamut 8 millionit koruuninit tapiissutigisinnaassagitsigik, IA-mi politikeri erseqqissaavoq.

Atuaruk: Aningaasanut inatsit: Naalakkersuisut isertitsissutissanik nutaanik nassaarput

Immikkut aningaasaliissutinit
Tassunga atatillugu taassuma tikkuarpaa, Piareersarfinnut immikkut 23 millionit koruuninik tunniunneqarnissaat Naalakkersuisunit pilersaarutigineqareersoq.

- Taakkununnga immikkut aningaasaliissutinut taarsiullugulu 5 millionit koruuninik atuilluni efterskolinut, højskolinut ingerlatseqatigiiffinnullu inuiannut akisussaaffilinnut atorusuppagut, Naaja Nathanielsen nassuiaavoq.

Atuaruk: Aningaasanut inatsit naammassilerpoq