aatsitassat
IA-p Aatsitassanut inatsit allanngortikkusukkaa
Inuit Ataqatigiit sinnerlugit Inatsisartunut ilaasortaq Peter Olsen, Aatsitassanut Ataatsimiititalliami sinniisuusoq, Aatsitassanut inatsisip allanngortinneqarnissaanik siunnersuuteqarpoq, nunaqavissut pinnersaasiassanik nalilinnik siunissami katersisinnaaleqqullugit
Qangaanerusoq kikkulluunniit ujaqqanik pinnersaasiassanik nalilerujussuarnik nunap qaavani nassaaminnik angerlaassisinnaasarput.
Imaassinnaavoq tuttunniarnermi, pisuttuarnermi allarluinnarmilluunniit suliaqarnermi ujaqqanik pinnersaasiassanik, soorlu rubinik, safirinik, diamantinik allanillu nassaartoqartoq angerlaassisoqarlunilu.
Innuttaasut periarfissaqassasut
Aatsitassanullu inatsisip katitigaasimanera tunngavigalugu ullumikkut taamaattoqanngilaq.
Aatsitassanut inatsimmi paragraf 45-mi allassimagaluartoq, inuk Kalaallit Nunaanni aalajangersimasumik najugalik tamakkiisumillu akileraartussaatitaasoq (najugaqavissoq) akuersissummik tamatumunnga pisariaqartitsinngitsumik inuussutissarsiummut atugassaanngitsumik aatsitassanik kaanngarsimasunik 100.000 koruunit sinnernagit nalilinnik katersuisinnaasoq, taamaattoq inatsit paragraf 45 c-mik ilassuteqarfigineqarpoq, tamatumalu kinguneranik diamantinik, safirinik, rubininik, smaragdinik chrysoberylitinik, opalinik aamma aatsitassanik radioaktiviusunik katersisoqarsinnaanngilaq.
Tamannali Inuit Ataqatigiinneersup Peter Olsenip allanngortikkusuppaa. Taannami siunnersuuteqarpq, Naalakkersuisut peqquneqassasut inatsimmut allannguutissamik suliaqarnissamik 2017-imilu saqqummiunneqartussamik, nunami innuttaasut nalinginnaasut rubininik, safirinik assigisaannillu katersillutillu piiaasinnaalernissaannik kinguneqartussamik.
Atuaruk: Aatsitassanut inatsit akuersissutigaat
Suliffeqarfiit kisimik iluaqutigigaat
Siunnersuuteqartoq isumaqarpoq, inatsimmi ullumikkut atuuttumi suliffeqarfiit nunanit allaneersut iluaquserneqartut.
– Inatsit ullumikkut atuuttoq ima paasineqariaannaavoq aatsitassanik atuinermik soqutiginnittut avataaneersut nunatsinni najugaqavissunut naleqqiullugit salliutinneqartut. Ujaqqat nalillit eqqartorneqaleraangata, uagullu nunatsinni inatsisiliorsimanerput nunani allani inatsisilianut assersuukkutsigu, maani nunatsinni innuttaaqativut qanoq annertunerusumik salliutittariaqarneri takusinnaavarput, Peter Olsen siunnersuutiminut tunngavilersuutitut allappoq.
Siunnersuummut isumaqataanngitsoq
Inatsisartunut ilaasortaq Siumumeersoq Jens-Erik Kirkegaard, Aatsitassanut Ataatsimiititaliamiut siulittaasuusoq, Peter Olsenip siunnersuutaanut oqaaseqarusunngilaq atuarsimannginnamiuk kiisalu ataatsimiititaliami Inatsisartuniluunniit suli oqaluuserineqanngimmat. Kirkegaardili siunnersuummut isumaqataanngilaq.
– Isumaga imaappoq, ujaqqanik pinnersaasiassanik nalilinnik nassaaraanni, ujaqqat akileraaruserneqarnissaat pingaartuusoq. Taamaattumik isumaqarpunga annikitsumik aatsitassarsiornissamut akuersissut avaqqunneqarsinnaanngitsoq. Kikkulluunniit akuersissutaateqaratik ujaqqanik nalilinnik katersisinnaatitaalerpata tamakkua akileraarusersornissaat ajornakusoorsinnaavoq, Jens-Erik Kirkegaard Sermitsiamut oqarpoq.
Allaaserisaq tamaat Sermitsiami saqqummeqqammertumi atuaruk, taanna uani pisiarisinnaavat: