Thule Air Base
IA: Nutaamik isumaqatigiissusiorsinnaaneq neriuuteqalersitsivoq
Qallunaat-kalaallit selskabiata Greenland Contractorsip Thule Air Basemut US Air Forcemik isumaqatigiissutaata sivitsorneqarsinnaaneranik nutaarsiassaq Inuit Ataqatigiit nuannaarutigaat
Inuit Ataqatigiit siulittaasuata Sara Olsvigip nuannaarutigaa qallunaat-kalaallit selskabiata Thule Air Basep (Pituffiup) ingerlanneqarneranik aserfallatsaalineqarneranillu US Air Forcemik isumaqatigiissunni sivitsorsinnaalermagu.
– Soorunami nuannaarutigissavarput landskarsip annaasassai ikinnerulissammata, kalaallit selskabiata isumaqatigiissut sivitsussapagu, Sara Olsvig Sermitsiaq.AG-mut oqarpoq.
Entreprenøritut ingerlatsivissuup MT Højgaardip tallimanngormat uppernarsarpaa US Air Force oqarsimasoq kissaatigalugu Greenland Contractorsimik, MT Højgaardimit namminersorlutillu oqartussanit pigineqartumik, isumaqartigiissunni sivitsorumallugu.
Suliassaq suli naammassinngilaq
– Pituffimmi kiffartuussinissamik isumaqatigiissummut suliassaq suli naammasseqqajanngilaq, sulilu amigaatigaarput pisortatigut uppernarsarneqassasoq Greenland Contractorssip sullissinissamik isumaqatigiissut nutartersinnaagaa, paasillugulu taamaattoqassappat isumaqatigiissummut nutaamut tunngavissat suut tunngavigitinneqassanersut, IA tunuluaqutarlugu folketingimut ilaasortaq Aaja Chemnitz Larsen tusagassiorfinnut nalunaarutikkut appaooq.
IA-millu folketingimut ilaasortap erseqqissarpaa nalunartoq alla tassaasoq, Exelisip aalajangiineq aalajangiisarfimmut qaffasinnerusumut ingerlateqqissaneraa, taamaassappallu kinguneqaatai suusinnaanersut, ilanngullugit aningaasatigut kinguneqaatissat suliarinnittussarsiuussinerullu ingerlanneqarnerata tamarmi kinguneqaatai.
– Ernumanartoqartissinnaavara suliassaq pingaartinneqarnersoq qanimullu malinnaaffigineqarnersoq, eqqarsaatigissagaanni suliassaq tamanna kalaallinut inuiaqatigiinnut aningaasatigut qanoq pingaaruteqartiginersoq. Folketingimi sulinera aqqutigalugu qallunaat naalakkersuisuannit suliassap ingerlateqqinnerata qulaajarneqartarnissaa pingaartissavara, tamannalu Inuit Ataqatigiit Inatsisartuni sulinerannut ataqatigiissarlugu, Inuit Ataqatigiinnit inatsisartunut ilaasortaq Aaja Chemnitz Larsen tusagassiorfinnut nalunaarummi allappoq.