IA: Naammattumik iliuuseqartoqanngilaq

Ukioq manna juunimi suliffissaaleqisut siornamit amerlanerupput. Qaammatikkaartumik naatsorsukkat ukioq manna siullermeerlutik siornamut sanilliullugu suliffissaaleqisut amerlanerunerannik takutitsipput, Sermitsiaq tallimanngornermi saqqummersoq paasissutissiivoq.

Tamatumali saniatigut ukioq manna ineriartornermi januaarimiit suliffissaaleqisutut nalunaarsorneqarsimasut 4.402-nik amerlassuseqartut ikiliartortuarsimanerat takutinneqarpoq, juunimili 3.592-it nalunaarsorneqarsimallutik. (Kisianni juunimi 2014-imi suliffissaaleqisut 3.473-iupput).

Tamatumali peqatigisaanik inuusuttut suliffissaaleqisut amerlanerat kisitsisinit takutinneqarpoq, suliffissaaleqisut 1.366-it 30-t inorlugit ukioqarmata. Taakkunannga 271-it 19-it inorlugit ukioqarput. 574-it 20-t 24-llu akornanni ukioqarput. 521-llu 25-t 29-llu akornanni ukioqarlutik.

Vittus Qujaukitsoq aviisi naapertorlugu suliffissaaleqinerujussuarmik nassuerutiginnippoq. – Suliffissaaleqisut nalunaarsorneqarsimanerini inuusuttut amerlavallaarput. Taakku immikkut navianartumiipput, tassami eqqortumik ikiorneqanngikkunik ukiorpassuarni pisortanit ikiorsiissutinik pisartagaqarnissaminnut aarlerinartorsiorput, oqarpoq.

IA-li aviisi naapertorlugu inuusuttunut erseqqinnerusumik suliniuteqartoqarnissaanik ujartuivoq.

- Isumaqarpugut Piareersarfinni inissanik amerlanernik pilersitsineq naammanngitsoq ,IA-p siulittaasua Sara Olsvig Sermitsiamut oqarpoq.

Inatsisartunit suliffissaaleqineq immikkut iliuuseqarfiginiarlugu 2014-imi aningaasaliissutigineqartut 174 millioner koruunit suli iluamik sulilersinneqarsimanngillat. Maannamut taamaallaat eqqaavissuit ilaanni saliinerit pisimapput, aviisimi atuarneqarsinnaavoq. Sara Olsvig isumaqarpoq, immikkut ittumik suliniuteqarneq iluatsissimanngitsoq.

Sanaartornerup annikilleriarnera suliffissaaleqisunik amerlanernik pilersitsisimanera Kalaallit Nunaanni Sulisitsisut aamma Sermitsiami tikkuarpaat.

Illoqarfiit ilaanni suliffissaaleqisut amerliartornerannut illoqarfinnilu allani ikiliartornerannut aaqqiissutissat ilaat tassaavoq nuttarsinnaanerulernissaq. Tamatumani nuttarsinnaanermut aningaasaliissutinik atuinissamut malittarisassat allanngortinneqarsimapput.

Aviisimi Tanbreez aamma oqarpoq, aatsitassarsiornermi praktikkerfissanik pilersitsinikkut sivisuumik suliffissaaleqisimasut suliffeqalernissamut ikiorniarneqassasut.

Sermitsiami tallimanngormat saqqummersumi uani pisiarisinnaasanni suli annertunerusumik atuarsinnaavutit,

Sermitsiaq Uge 30 2015

Klik her for at læse