IA: Naammaginanngilaq maleruagassat malinneqarsimannginnerat

Sermitsiaq.AG-mi tallimanngornermi marsip 20-ani allaaserineqartutut nunatsinni borgmesterit sisamaasut aliatsaatigivaat kommunini sulisut pinerluttunngortinneqarmata kommunini marlunni isumaginninnikkut nakkutilliisoqarsimanerata kingorna, naak nakkutilliivigineqartut nalunaarusiaq takusimanngikkaluaraat.

Borgmesterit taama ataatsimoorlutik nalunaaruteqarnerat pivoq Inatsisartut ilaqutariinnermut peqqissutsimullu ataatsimiisitaliaa tusagassiuutinut nalunaaruteqareersorlu. Nalunaarummi, ataatsimiisitaliap siulittaasuata, Demokraatineersup Tillie Martinussenip oqarnera naapertorlugu, ataatsimiisitaliaq Qaasuitsup Kommunianut Qeqqatalu Kommunianut isumaginninnikkut nakkutilliiartorsimanerit inernerinut annilaartinneqarpoq, ilaqutariinnermut, naligiissitaanermut isumaginninnermullu naalakkersuisup, Siumumeersup Martha Lund Olsenip Qaasuitsup Kommuniani Qeqqatalu Kommuniani isumaginninnikkut nakkutilliiartorsimanerit eqqartorlugit ataatsimeeqatigereernerani.

Atuaruk: Kommunit meeqqanut inuusuttuaqqanullu sumiginnaanerannut ataatsimiisitaliaq annilaartoq

Kommunit pineqartut tusarniarneqanngillat
Kisianni nunatsinni borgmesterinut sisamaasunit soqutiginartinneqarpoq paasissallugu isumaginninnermut naalakkersuisoqarfik nakkutilliisarnernut aalajangersakkat naapertorlugit qisuariarsimanersoq, tassami nakkutilliiartornerup inerneranik ilaqutariinnermut peqqissutsimullu Inatsisartuni ataatsimiisitaliaq Martha Lund Olsenimit saqqummiivigineqarsimammat kommuunit pineqartut nalunaarusiaq suli tigusimanngikkaat imaluunniit utertitsivigisimanngikkaat.

- Periaasissatut aalajangersagaasut paasisinneqarnerput naapertorlugu malinneqarsimanngillat, Inatsisartut ilaqutariinnermut peqqissutsimullu ataatsimiititaliaat nalunaarusiamik suliluunniit kommunini tiguneqarsimanngitsumik saqqummiivigineqarsimammata. Suliani nalunaarusiap kommuninit tiguneqareerfigisimasaani takuneqarsinnaanngilaq ilaqutariinnermut isumaginninnermullu naalakkersuisoqarfiup kommuninit paasissutissanik piniarsimasinnaanera, nalunaarusiami fagitigut pissusiviusunillu tunngaveqartumik kommuninit iliuusaasut pillugit, Kanukokap siulittaasua, Siumumeersoq Martha Abelsen, marsip 20-ani borgmesterit sinnerlugit taama allappoq.

Atuaruk: Borgmesterit: Kommunini sulisunut pasilliutit alianartut

IA: Aalajangersakkat malittariaqarput
Inuit Ataqatigiit Inatsisartut ilaqutariinnermut peqqissutsimullu ataatsimiisitaliaani ilaasortat, Juliane Henningsen aamma Aaja Chemnitz Larsen maanna borgmesterit nalunaarutaannut qisuariaateqarput.

- Kommunit namminneq oqarnerisigut nakkutilliinermit nalunaarusiat maleruagassat naapertorlugit qaammaatit marluk iluanni tigusassaagaluatik aatsaat noqqaaqqaarlutik ilaqutariinnermut, naligiissitaanermut isumaginninnermullu naalakkersuisoqarfimmit tigusimavaat, IA-kkormiut taakkua marluk tusagassiuutinut nalunaaruteqaruteqarlutik taama allapput.

Taakkualu ima nangipput:

- Tamanna naammaginanngilaq Inuit Ataqatigiinnillu maleruagassat soorunami malinneqarnissaat kajumissaarutigerusupparput. Meeqqat paarinerlunneqartut qitiutilllugit suleqatigiittariaqartoq oqaatigissallugu pingaaruteqarpoq.

Atuaruk: 'Meeqqat sumiginnakkat' pillugit suliniuteqarnermi politikkikkut suleqatigiinneq

Aalajangersimasumik sullitaqarnissaq ujartorpaat
Inunnik isumaginnittoqarfimmi suliassiissutit amerlassusaannut Inuit Ataqatigiinnit aalajangersimasumik missingeruusiortoqarnissaa siunnersuutigineqarpoq, tamannalu Juliane Henningsenip aamma Aaja Chemnitz Larsenip oqarnerat naapertorlugu naalakkersuisoqarfimmit periusissat pillugit allakkiami tapersersorneqarpoq.

- Taamaattorli uagut ilisimasagut naapertorlugit aningaasartaliinissaq qulakkeerniarlugu naalakkersuinikkut iliuuseqartoqarsimanngilaq, taamatullu sullissisut ilaasa isumagisassaminnik 100 - 300 missaanik ingerlassaqarnerat pinaveersaartinniarlugu kommuninik suleqateqarnisssaq aallartissimanagu. Sullissisut ataasiakkaat piviusorpalaarnerusumik amerlassusilinnik suliassaqatinneqarnissaat originartikkaluarparput, tamannali sulisut kattuffii tamakkunatigut ilisimasaqarnerusut suleqatiginerisigut aalajangerneqartariaqartutut isumaqarfigaarput, taakkua marluullutik taama allapput.

Nakkutilliinermit nalunaarusiat malitseqaqquvaat
Taakkua nangillutik allapput nakkutilliinermit nalunaarusiat, taamatullu nakkutilliinermit nalunaarusiat aalajangersimasut ilaannakuusumik tigusimasatik qanoq iliuuseqarfigineqassanersut Inatsisartut ilaqutariinnermut peqqissutsimullu ataatsimiititaliaani ilaasortatut arlaleriaqalutik ujartortarsimagaluaritik.

- 12. marts 2015 Ilaqutaariinnermut, Naligiissitaanermut Isumaginninnermullu Naalakkersuisoq Ataatsimiititaliamut aggersarlugu isumasioqatigiinnermi ilisimatinneqarpugut kommunit oqaloqatigineqarlutik allaffigineqarlutillu nakkutilliisut pillugit ilisimatinneqarsimasut, tamannali pisimasorinanngimmat eqqumiiginngitsuunngilarput, IA-kkormiut taakkua marluk allapput, imalu nangillutik:

- Nakkutilliineq pillugu maleruagassat Naalakkersuisoqarfimmit malinneqartut naatsorsuutigisimavarput, kommunillu tamanna tusagassiorfitsigut aatsaat tusareerlugu isumasiorneqarsimanerat kusananngitsutut naleqqutinngitsutullu isigineqarmat paasilluarsinnaavarput. Siunissami aalajangersakkat Naalakkersuisoqarfimmit malinneqarnissaat qulakkeerniarlugu uagut ataatsimiititaliami ilaasortatut pisinnaasarput naapertorlugu isumaginiassavarput.