IA: Naalakkersuisut siulittaasuata inatsit una unioqqutippaa - taamaattumik tunuartariaqarpoq

- Pisortaqarfimmi sulisunut pisuutitsineq inissiminiinngilaq pissusissamisuunngilaq ilumoorussinerunanilu.

Inatsisartuni Inuit Ataqatigiit gruppia sinnerlugu Agathe Fontain aamma Juliane Henningsen tusagassiutinut nalunaaruteqarput.

Siumumeersup Aleqa Hammondip Naalakkersuisunit Inatsisartuniillu sulinngiffeqarnissamik qinnuteqarpoq aningaasanik atuisimanera pillugu kukkunersiuisut qulaajaaneranni. Kukkunersiuinermut Ataatsimiititaliap isumaliutissiissutaa suli naammassineqanngilaq. Taanna Naalakkersuisut siulittaasuat ammaalluni oqalugiareerpat saqqummiunneqassaaq.

Kukkunersiuinermut Ataatsimiititaliamit nalunaarutigineqartareerpoq Aleqa Hammond nunatta karsianit 106.363,27 koruuninik namminerminut ilaquttaminullu atuisimasoq. Taakku maajip 28-anit 2013-mit maajip 21-anut 2014-mut aningaasat atorneqarput. Naak akiliisoqarnissaanik allagarsiisoqartaraluartoq akiligassarineqartut septembarip arfineq pingajuanni aatsaat akilerneqarput.

- Inuit Ataqatigiinniit ajuusaarutigiinnarsinnaavarput nunamut siuttuusup aningaasartuutinut malittarisassat atuuttut ilisimasimanngimmagit; tamatumunngali ajuusaarneq naammanngilaq. Inatsisinik unioqqutitsisimagaanni; taava nunamut aqutsinissamut ataqqinassuseq tatiginassuserlu piunngilaq, Inuit Ataqatigiit tusagassiutinut nalunaaruteqarpoq.

Ukua Aleqa Hammondip unioqqutikkai Inuit Ataqatigiinnit isumaqarput:

1)

Inatsisartuni Naalakkersuisunilu il. il. ilaasortat aningaasarsiaqartitaanerat il. il. pillugit Inatsisartut inatsisissaat nr. 22, 18. december 2003-meersoq:
Ҥ 8. Inatsisartut siulittaasuata, Naalakkersuisut siulittaasuata Naalakkersuisunilu ilaasortat Inatsisartut siulittaasuattut, Naalakkersuisut siulittaasuattut Naalakkersuisunilu ilaasortatut angalaneri Landskarsimit akilerneqassapput.
Imm. 2. Nerisaqarnermut ineqarnermullu aningaasartuutit kingusinnerusukkut Landskarsimit akilerneqartussanngorlugit akiligassaq malillugu matussuserneqartassapput.
Imm. 3. Immikkut pissutissaqartillugu Inatsisartut siulittaasuata, Naalakkersuisut siulittaasuata Naalakkersuisunilu ilaasortat Inatsisartut siulittaasuattut, Naalakkersuisut siulittaasuattut Naalakkersuisunilu ilaasortatut suliaminnut atatillugu angalaneranni aapparisat inooqatigisalluunniit angalaqatigineqarsinnaapput. § 8, imm. 2 aamma taamatut atuutissaaq.”
Namminersorlutik Oqartussat arlaleriarlutik Naalakkersuisut Siulittaasuata ilaqutai ilanngullugit akiliuttarsimavaat.

Deloitte-p ilisimatitsineranut tunngaviusoq:
2. Namminersorlutik Oqartussat Naatsorsuutinut allattuiffianni imm. 5.2.-mi allassimavoq ingiaqataasussat bilitsinik Namminersorlutik Oqartussat angalatitsiviat aqqutigalugu inniminniisoqarsinnaasoq erseqqissumilli aamma allassimavoq nammineq akiligassat angalaneq isumannaarneqarsimasussaasut.
Tamanna malinneqarsimanngilaq. Kukkunersiuisut nalunaarutigaat Namminersorlutik Oqartussat malittarisassaannut unioqqutitsinerusumik iliortoqartarsimasoq.

3. Ilassinninnermut aningaasartuutinik, angalanermi aningaasartuutinik aamma aningaasartuutinik allanik il.il. Naalakkersuisut atuinerat pillugu Naalakkersuisut kaajallaasitaat.
Ҥ 16. Naalakkersuisunut ilaasortat ataasiakkaarlutik namminneq suliassaqarfimmi iluanni akisussaapput kaajallaasitami aalajangersakkat malinneqarnissaannut, matumani aningaasaliissutitut killiussat malinneqarnissaat pineqartumut tunngatillugu ilassinninnermut aamma angalanermut aningaasaliissutinut tunngasut ilanngullugit.

Aalajangersakkat malinneqarsimanngillat.'

- Tamanna Inatsisartut inatsisaanni nr. 6 13. Maj 1993-imeersumi § 5-imi atuarneqarsinnaavoq. Taamaattumik Pisortaqarfimmi sulisunut pisuutitsineq inissiminiinngilaq pissusissamisuunngilaq ilumoorussinerunanilu, Inuit Ataqatigiinnit allapput.