Atassutip Inuusuttai

IA-mut isornartorsiuineq: Pisuut pillarneqassanngillat

Inuit Ataqatigiit inunnut 1 million koruunit sinnerlugit isertitalinnut akitsuusersuinermik eqqussiniartut Atassutip Inuusuttaasa Kattuffiata akerlilerpaa

Inuit Ataqatigiit inunnut 1 million koruunit sinnerlugit isertitalinnut akitsuusersuinermik eqqussiniartut Atassutip Inuusuttaasa Kattuffiata akerlilerpaa

Aviisip AG-p uani sapaatip-akunnerani allaaserinninneratut, Inuit Ataqatigiit Nunatsinni akitsuusersuinermik eqqussiniarput.

- 1 million koruunit sinnerlugit isertitallit. Assigiinngissutsit annikillisinneqarnissaat uatsinnut pingaarnertut anguniagaavoq, IA-mi siulittaasoq Sara Olsvig AG-mut ilaatigut oqarpoq.

Atassutip Inuusuttunut Kattuffiata Sara Olsvig isornartorsiorpaa. Kattuffimmi siulittaasoq Aqqalu Jerimiassen akitsuusersuinissamik eqqarsarneq nunatsinni periarfissat matuneqarnissaanik isumaqartoq, tusagassiuutinut nalunaarummi allappoq.

Atuaruk: IA: Millionærit akileraarnerusalissapput

Annertuumik tapeeqataareersut
- Ilinniarniaritsi qaffasissumik, naammassigussi akiligassissaqqaarpatsigit. Suliffeqarfiutitaarniaritsi ilungersorlutit isertitavit affai tigoqqissaqqaarpagut. Tassa taama erseqqaritsigisumik Inuit Ataqatigiit siulittaasuat (Sara Olsvig, aaqq.) oqariartuuteqarpoq, Aqqalu Jerimiassen oqarpoq.

Nammassinnaanerusut nammatassaqarnerutinneqassasut Sara Olsvig oqarpoq. Kisianni Atassutip Inuusuttaasa Kattuffianni siulittaasup aamma taamatut oqariartuuteqarneq akerleraa.

- Isertitaqqortuummi akunnattumillu isertitallit ila annertuneroreeqaat akileraartarnikkut tunniussaqartarnerat naak akileraarutip procentia taannaannaagaluartoq. Aatsaallimi tassa taanna taasinnaasara naligiisitsinnginneq, Aqqalu Jerimiassen erseqqissaavoq.

Atuaruk: Atassutip inuusuttai: Sioorasaarineq aqqutissaanngilaq

Periarfissanik pilersitsigitsi
Akitsuusersuinermik eqqussineq nunatsinnut annertuumik eqquissaaq, taanna isumaqarpoq.

- Nunarput patajaatsumik inuussutissarsiornikkut takornariaqarnikkullu siuariartussappat aallarnisartunut naalleraaniarneq aqqutissaanngilaq torrallataq, ipisaanerullunili, Aqqalu Jerimiassen oqarpoq.

Atassutip Inuusuttaasa Kattuffianni siulittaasoq naapertorlugu akileraarusersuinerup avataanik tikisitsisarneq kingunerissavaa, soorlu nakorsat kigutilerisullu.

- Ilinniarluarsimasut pillarneqassanngillat, imaluunniit namminersulerniarlutik ilungersorsimasut. Aporfilersuiunnaarlusi periarfissanik pilersitsiniaritsi, Aqqalu Jerimiassen oqarpoq.

Atuaruk: Politikeri inuusuttoq: Pisortanit tapiissutit amerlineqartariaqanngillat

Powered by Labrador CMS