IA mittarfiit pillugit: Qinersinerup kingorna suliaq nanginneqassaaq
Kangerlussuarmi mittarfik 1.500 meterisut takissusilittut ingerlatiinnarneqassanersoq, IA-p siulittaasuata Sara Olsvigip oqaaseqarfigerusunngilaa. Aningaasartuutit 500 millionit koruuninit amerlanerusut. Kism Kielsen aamma nipaappoq.
- Qinersinissap nalunaarutigineqannginnerani inuiaqatigiitaningaasaqarneranut kingunissat pillugit nalunaarusiaq utaqqigaluarparput. Maanna nalunaarusiat – amigaatillit – saqqummiunneqaqqammerput. Oqaatsit ataasiinnaat atorlugit. Taamaalilluta attaveqaqatigiinnermut aningaasaliissutit ukiorpassuarni annerpaartarigunagaat taakku aallaavigalugit aalajangiiffigissallugu piviusorsiornerunngilaq, Sara Olsvig Sermitsiaq.AG-mut oqarpoq.
Peqqissaartumik suliarinninneq
Partiitut akisussaasutut Inatsisartunngortussani aamma Naalakkersuisunngortussani sammisap peqqissaartumik suliarineqarnissaa kissaatigineqartoq, Sara Olsvig naqissusiivoq.
Attaveqatigiinnermut Naalakkersuisoqarfiup inuiaqatigiit aningaasaqarnerannut kingunissat nalilersorneqarnerat tallimanngormat saqqummiutissallugu aalajangiuppaa, taanna Deloittemit suliarineqarpoq.
Mittarfiit pingasut nutaat aamma Kangerlussuarmi mittarfik 1.500 meterisut takissuseqartoq 500 millionit koruuninik akeqassasut, nalunaarusiami atuarneqarsinnaavoq, aningaasallu taakku suliniummi naatsorsuutigineqarsimanngillat.
Amerlanerit ilanngunneqassapput
- Naalakkersuisoqarfiit amerlanerit aamma minnerunngitsumik kommunit suliami ilaatinneqassapput, nunatsinnilu pisariaqartinneqartorpassuit peqqissaarussassat tassani pineqarput. Suliaq taamatut ingerlasimammat, Inatsisartunngortussat Naalakkersuisunngortussallu oqaluuserinnilluarnissaat piviusorsiornerusutut aamma tulluarnerusutut isigaarput, tassanilu assersuutigalugu takornariaqarnikkut periarfissat pillugit paasissutissat ilanngullugit, Sara Olsvig ilisimatitsivoq.
Kim Kielsenip suliaq ullumikkut oqaaseqarfiginiarnagut allatsiminut nalunaarsimavoq. Taassumali siornatigut Kangerlussuaq takornariaqarnikkut periarfissalerujussuunerareerpaa, tamannalu tunngavigalugu mittarfik ukiuni arlalinni niuerpalaartumik ingerlasinnaanngornissaata tungaanut aningaasalersornissaanut piareersimalluni oqaatigereerpaa.
Takornariaqarnikkut periarfissaq ilanngunneqanngitsoq
Periarfissani assigiinngitsuni takornariaqarnikkut periarfissaq nalilersorneqarsimanngitsoq, Deloittep misissuinerani oqaatigineqarpoq.