spionage
IA ministeriunermut: Kalaallit politikerit anngiortumik tusarnaarneqartarpat?
Amerikarmiut isertortumik paasiniaasarfiata NSA-p nunarsuarmi tamarmi nunat qullersaat anngiortumik tusarnaartarsimavai. Aamma Kalaallit Nunaat taamaasiorfigineqarpa? Sara Olsvigip, IA, qallunaat ministeriunerat taamatut aperaa
Isertortumik paasissutissiistup Edward Snowden-ip paasissutissiinerata takutippaa Danmarkip NSA suleqatigisimagaa. Tamanna peqatigalugu paasineqarpoq isertortumik paasiniaasarfiup NSA-p nunarsarmi tamarmi nunat qullersaat 35-it anngiortumik tusarnaartarsimagai. Maanna Inuit Ataqatigiit ministeriuneq qinnuigaat uppernarsaqqullugu kalaallit politikerii atorfilittaallu anngiortumik tusarnaartarneqarsimanngitsut.
Tamanna pivoq paragraff 20 naapertorlugu ministeriunermut Helle Thorning-Schmidtimut apeqquteqarnermigut.
– Pingaaruteqarpoq piviusut saqqummiunneqarnissaat, pingaartumik paasineqassagaluarpat Kalaallit Nunaanni politikerit atorfillillu anngiortumik tusarnaarneqartartut. Nunat allamiut isertortumik paasiniaasarfiat unioqqutitsilluni nunami maani anngiortumik tusarnaartarsimappat tamanna akuersaarneqarsinnaanngilluinnarpoq, Sara Olsvig oqarpoq, taassumalu ministeriunerup Helle Thorning-Schmidtip akissutissaa utaqqivaa.
– NSA-mik paasisat minnerunngitsumik soqutiginarput eqqarsaatigissagaanni ukiuni kingullerni Kalaallit Nunaata nunanit tamalaanit soqutigineqarnerulersimanera. Nunat tamalaat soqutiginninnerat pingaartumik annertusiartorsimavoq Kalaallit Nunaanni uuliamik aatsitassanillu suliniutit oqallisigineqarneranni. Taamaattumik Inuit Ataqatigiit isumaqarput Nunatsinnissaaq nunap siuttui anngiortumik tusarnaarneqartarsimanersut qulaajassallugu pissusissamisoortuusoq.