Allattoqarfik

IA-mi politikkeri: Suliaq kukkusumik ingerlanneqarpoq, Lars-Emil

Inatsisartut Allaffeqarfissaata sumi inissinneqarnissaanut suliami Inuit Ataqatigiinni politikkerimit isornartorsiorneqarpoq

Inatsisartuni ilaasortaq, Naaja Nathanielsen - Inuit Ataqatigiit

Inuit Ataqatigiit isumaqarput Kommuneqarfik Sermersuup sapaatit akunneranni matumani tusarniaaneranut akulerunneq pissusissamisuungitsoq, tassami Nuummi inuttaasut taamaalillutik ataatsimiittarfittaap sumiinnissaanut isummernissaminnut periarfissinneqaraluarput.

Innuttaasut sinnerlugit qinikkatut uagut salliulluta innuttaasut namminneerlutik isummersinnaanerat ataqqisariaqaraluarparput, Inuit Ataqatigiinni Inatsisartunut ilaasortaq Naaja Nathanielsen oqarpoq.

Inuit Ataqatigiitnni aamma oqaatsit atorneqartut kiisalu assit allanngortitikkat quppersakkami tamanut agguaanneqarsimasumi atorneqartut isornartoqartippaat.

- Nuummi illoqarfiup immikkoortuisa ilaat qinikkat ataatsimiittarfissaannut inissiivissatut 'ataqqinannginnerarlugit' tikkuaaneq aammalu assit graffitinik titartagalersukkat akuersaaruminaatsippagut, oqarpoq.

Nuummi innuttaasut 16-leereersimasut Inatsisartut Allattoqarfiata sumi inissisimanissaa taasissutigisussaavaat.

Inatsisartut isummersunngitsut
- Piumasaraarput Inatsisartut siulittaasuata Lars-Emil Johansenip innutaasunut erseqqissassagaa sunniiniarneq nammineerluni Inatsisartullu Allattoqarfiata akisussaaffigalugu. Tamanna pisariaqarpoq amerlasuunit isumaqartoqalermat Inatsisartut tamarmiullutik ataatsimiittarfiup ”Aqqaluup Aneerasaartarfiani” inissinneqarnissaanut isu-maqataasut aammalu Inatsisartunut ilaasortat tamarmik taamatut sunniiniaqataasut, Naaja Nathanielsen allappoq.

Powered by Labrador CMS