IA-mi ilaasortaq: Nunatut pisariaqartipparput aningaasarsiornikkut allanngortiterinissaq

- Nunatta aningaasaqarneranut aalisarnerup iluani periarfissat, aningaasarsiornerullu ineriartornera apeqqutaalluinnarput. Ukiuni kingullerni akitigut, pisatigullu ineriartorneq pitsaasuusimavoq. Avaleraasartuunik misileraalluni aalisarneq immikkut qiviassagaanni 2013-imi, 2014-imilu aningaasaqarnermut iluaqutaasimavoq, taamaakkaluartorli 2014-imi aningaasaqarneq tamaat isigalugu kinguariarneq matussusersinnaasimanngilaa.

Inuit Ataqatigiinnit Kommuneqarfik Sermersuumi kommunalbestyrelsimi ilaasortaq Allan Pertti Frandsen tusagassiutinut nalunaarummi allappoq.

Nunatsinni inuussutissarsiornikkut ingerlatatta pingaarnersaat erseqqissunik atugassaqartiviusariaqartoq isumaqarpoq. Pisussaaffittut isigaa partiit allat isumaqatigiissuteqarfiginissaat taamatullu aamma soqutigisaqaqatigiit tamarmik akuutinnissaat pingaaruteqartigaaq.

- Nunatut piaartumik pisariaqartipparput aningaasarsiornikkut allanngortiterinissaq. Aalisarnerup, suliffissaqartitsiniarnerullu iluani. Aaqqissuusseqqittariaqarpugut, sulineq imminut akilersinnaatilerlugu, ikiorsiissutinillu pisartagaqarnermut piumasaqaatit sakkortusitillugit. Aaqqissuusseqqinngikkutta, ajornartorsiutillu kinguartitiinnarlugit, taakku annertusiartuinnassapput, nunallu tamarmiusup aningaasaqarnera suli ernumanarnerusumut inississaaq, Allan Pertti Frandsen oqarpoq.

Nangillunilu:

- Aaqqissuusseqqinnissat tamanut annernartussaapput. Kisianni ajornartorsiutit qaangissagutsigit, taava pisortat kiffartuussinerannut atatillugu sakkortuunik aaliangiisariaqarpugut. Aamma immikkoortuni assigiinngitsuni, pisortat kiffartuussinerisa annikillisinnissaat, innuttaasutullu pisussaaffigut, inuussutissarsiornerlu, piareersimaffigisariaqarpagut. Soorlu kina oqarami, pisortat kisimik pinngortitamik minguitsuutitsillutillu kusanartuutitsisussaasut? Tamatta eqqakkatsinnik saliinissatsinnut akisussaaffeqarpugut.

Akileraartarnermut aaqqissuussaanitsinni akissarsiaqqortunerit salliutinneqartut isumaqarpoq. Kiisalu ineqarnermut Nunatsinni politikkeqartugut ukiumut pisortanut 450 million koruunilimmik.

- 100 millionit boligsikring-imut isertitakinnerusunut ingerlasarput. 350 million-illu nammineq pigisamik illusinermi ernianut tapiissutaasarput, pissaqarnerusunut iluaqutissatut. Pisortat ineqarnermut tapiissutaanit 4,50-inik, 3,50-it kukkusunut tuttarput. Taakkulu nunatsinni piitsut, pisuullu assigiinngissutaannut annertusaaqataaginnarput.

- Akileraartarnikkut aaqqissuusseqqinneq, soorlu isertitat pinnagit, atuinermik akileraarusiinerusoq, ineqarnikkullu aaqqisuusseqqinneq, isertitaqarnerusunik iluaqutissiinnginnerusoq, taakkuupput marluk inuiaqatigiinni pingaarnersiugassatta ilaat.

- Inuiaqatigiinni atugarissaarneq attatiinnaasagutsigu, pisortanit qanoq pissarsisinnaanerluta aperisarunnaartariaqarpugut. Nunatta qanoq sullissinnaaneraatigut apeqqutigiunnaartariaqarparput. Illuatungaanili aperisariaqarpugut, uagut nammineq nunarput qanoq sullissinnaanerlugu! Tamanna tamatsinnut atuuppoq, Allan Pertti Frandsen oqarpoq.