IA-mi arnat ilisarnartut pingasut: Partii siulittaasumik nukittuumik pisariaqartitsivoq

Inuit Ataqatigiit arnat pingasut ilaasortat, partiimi siulittaasunngorniartoqalinnginnerani ataatsimoorlutik oqariartorput. Kommune Qeqertalimmi Kommuneqarfik Sermersuumilu borgmesterit marluk kiisalu partiip folketingimili ilaasortaatitaat ataatsimoorlutik tusagassiutinut nalunaaruteqarput.

- Inuit Ataqatigiinni inuit ilisarnartut ukua pingasut neriuutigisaat tassaavoq, IA-miit qineqqusaartumik nukittuumik sassartoqassasoq, tusagassiorfinnut nalunaarummi allaqqavoq.

- Inuit Ataqatigiit kisimik nutaamik siulittaasortaartussanngillat. Nunarput tamakkerluni siuttunik nutaanik aallartiffissamillu nutaamik pisariaqartitsivoq. Taamaattumillu Inuit Ataqatigiinni partiip siulittaasussaa assorujussuaq pingaaruteqartussaavoq, IA-mi ilaasortat kisiisa eqqarsaatiginagit – nunamulli tamarmut, Aaja Chemnitz Larsen taama nalunaaruteqarpoq.

Nunap aqquttussaatut piukkunnaatilik

Partiimi maanna siulittaasup tulliitut inissisimasut, Aqqaluaq B. Egede aamma Múte Bourup Egede siulittaasutut piukkunnanngitsutut isigineqartutut, tusagassiutinut nalunaarut isumaqarnersoq aperineqarami, Aaja Chemnitz Larsen toqqaannanngitsumik akissuteqarpoq.

- Siulittaasutut qineqqusaartussatut piukkunnartumik nukittuumik nassaarnissarput pingaaruteqartorujussuuvoq. Nunatsinni partiit annerup tulliuvugut, taamaammat akisussaaffik annertooq siulittaasunngortussap tigusussaavaa, Sermitsiaq.AG-mut oqarpoq.

Partiip anguniagai pillugit ersarissumik oqaluttuarsinnaasumik partiillu ilaasortaanik peqataatitsilluartumik siulittaasussatut qineqqusaartussanik nassaarnissaq pineqartoq, taanna nassuiaavoq.

- Partiimut kisimi tamanna pingaaruteqanngilaq, aamma inuiaqatigiinnut pingaaruteqarpoq, nassuiaavoq.Ane Hansen aamma taama isumaqarpoq.

- Inuit Ataqatigiinni siuttuuneq aamma nunatsinnut tamarmut siuttunngorsinnaanermik isumaqarpoq. Taamaattumillu siulittaasussatut qineqqusaartussat tamanna piareersimaffigissagaat pingaaruteqarluinnartuuvoq: Akisussaafferujussuaq suliassarujussuarlu naatsorsuutigineqassapput, Ane Hansen allappoq.

- Aaja Chemnitz Larsen, ima paasisariaqarparput siulittaasussamik, aamma Naalakkersuisut Siulittaasuattut qineqqusaartussamik ujartuisusi?

- Taannaasariaqarpormi politikkikkut suliaqarnermi anguniakkat pingaarnersaat. Ataatsimoorluta tamatta tunniussaqarsinnaanermik peqarluta takutereerparput, taava aamma nunap aqunneqarnissaanut anguniagaqartoqartariaqarpoq.

Ane Hansen isumaqataavoq.

- Inuit Ataqatigiinni siulittaasunngortussap naalakkersuisunut siulittaasunngornissaa anguniarparput. Atuuffimmilu tassani nutaanik eqqarsartoqartariaqarpoq politikkitigullu ineriartortitsisoqartariaqarluni. Taamaattumik Inuit Ataqatigiinni siulittaasussamut qinersinissaq anguniakkamut kivitsisinnaasuusariaqarpoq, partiilu nunarput pillugu suli annertunerusunik angorusutaqarfissatut aallaaviussalluni, Ane Hansen allappoq.

Nunami aqutsisut nutaat

Inuit Ataqatigiit nunami aqutsisussatut piukkunnartutut inissisimalernissaa, Siumullu taarserlugu naalakkersuinikkut inissisimalernissaa, arnanut pingasunut taakkununnga pingaaruteqarpoq.

- Siuttutut piginnaaneqartariaqarpoq, tusarnaarsinnaanermik aalajangiisinnaassuseqarnermillu piginnaaneqartariaqarpoq, mikisualuit pingaarutaannik paasinnissinnaassuseqartariaqarpoq peqatigitillugulu qulaaniit tamanik isiginnissinnaassuseqartariaqarlunilu suut tamarmik ataqatigiissuunerannik takunnissinnaassuseqartariaqarluni.Tamakkorpiaat pilluit Inuit Ataqatigiit siulittaasussaannut piumasaqaatit annertuujupput, Ane Hansen allappoq.

Isumaqatigiissut?

Asii Chemnitz Narup ilaliivoq:

- Ukiuni kingulliunerusuni politikkimi arnat pikkorissorsuit annaasimavagut. Inuusuttatta nunarput siunissaqarfissatut upperiunnaarlugu qimattarpaat. Avissaartuunneq misigaarput, inuillu nunatsinni inunngorsimasut peroriartorsimasullu, sulisimasut ilaqutaqalersimasullu Kalaallit Nunaanni angerlarsimasutut misigisimajunnaartartut misigaarput. Tamanna inuiaqatigiittut akissaqartinngilarput.

- Inuit Ataqatigiinni siulittaasoq ataatsimoortitsisinnaasoq pisariaqartipparput, imaaginnanngitsoq partiimut siulittaasutut aqqutissamik tikkuussisutut – ukiorpassuanngortunili naalakkersuilluannginnermut pisortatigullu pitsaanngitsumik oqalliseriaaseqarnermut taarsiutissamik tikkuussisinnaasumik pisariaqartitsivugut. Inissaqartitsineq, piviusorsiorneq sulisinnaassuseqarnerlu pisariaqartinneqarput.

- Aaja Chemnitz Larsen, partiimi siulittaasussamik piukkunnartumik ataatsimoorlusi ujaasivisi?

- Partiimi tamatta ujaasinnguatsiarpugut, qungujulaarluni akunnattuulaarlunilu akivoq.

- Qularnanngilaq Sara taarseruminaassasoq. Aammali aallartinneq nutaajusinnaavoq, allatut suleriuseqalersinnaalluta. Siulittaasoq nutaaq nammineq suleriusissaminik nassaarniartussaassooq.

- Siulittaasup tulliatut sassarnissat eqqarsaatersuutigiviuk?

- Maannakkuugallartoq qineqqusaarnissannik kissaateqanngilanga. Siulittaasunngortussalli partiimi qinigaasimasut tunuliaqutaasullu sapinngisaat atorluarniartariaqarpai. Maannakkumut partiimi ilaasortarpassuit siulittaasussamut qanoq tunniussaqarsinnaanerlutik eqqarsaatersuuteqarput.

Partiip qinigaatitai tunuliaqutaasullu peqatigalugit partiip politikkiata inerisarnissaa siulittaasunngortussap pingaarnertut suliassarigaa, Aaja Chemnitz Larsen isumaqarpoq.

- Namminersorlutik Oqartussat eqqunneqarneraniit ukiut qulinngorluinnalerput. Namminersornerunissamilli periarfissat namminersornermut inatsimmiittut tamakkiisumik suli atulersimanngikkigut isumaqarpunga.